775

wikipedia

abril, 25: batalla de Bagrevand, onde os abbasí poñen fin á rebelión armenia, consolidando o control musulmán sobre Transcaucasia, mentres as principais familias nakharar de Armenia, sobre todo os Mamikonian perden o seu poder e buscan refuxio no Imperio bizantino.

agosto, 23: data de redacción dun documento con sinatura de Silo; é unha doazón a cinco frades para que constrúan unha igrexa entre os ríos Iube (Eo) e Masma; máis concretamente entre o Alesancia (río Grande, en Ribadeo) e o Mera, no lugar Lucis (Celeiro de Mariñaos, no concello de Barreiros).

setembro, 14: morre Constantino V durante unha campaña contra os búlgaros. Sucédeo León IV, logo de derrotar a Cristóforo e Nicéforo, irmáns seus. Os tres foran nomeados césares polo seu pai.

León IV suaviza as medidas contra os iconódulos por influencia de Irene, a emperatriz, ateniense e iconódula en segredo.

Hadriano I recupera o control do exarcado de Ravenna.

Carlos convoca unha gran asemblea en Quierzy e dirixe un exército franco ao interior de Saxonia e recupera o castrum de Syburg, restaura e instala un novo continxente en Eresburg. Na beira do Weser atópase un continxente saxón disposto a plantar batalla, que é derrotado cando os francos cruzan o río.

Widukindo cruza o Weser con outro continxente e loita en Hlidbeck. Carlos non logra unha vitoria total. Debe reorganizar as súas tropas e atacar novamente, esta vez con éxito, mais Widukindo escapa.

Carlos recupera o Hellweg ao longo do val do Lippe, establecendo comunicacións entre Austrasia, Hesse e Turinxia. Promóvese o comercio nel. Fúndase a cidade de Giessen na zona.

mercadores de al-Andalus fundan unha colonia comercial en Tenes (Alxeria), evidencia do renacemento do comercio marítimo na zona occidental do Mediterráneo despois do caos de anos anteriores.

outubro, 7: morre al-Mansur, sucedido polo seu fillo al-Mahdi, que fai oficial a doutrina sunni. Os chiís, decisivos no ascenso ao poder dos abbasí, constitúense en oposición.

Baghdad é probablemente a maior cidade do mundo, logo dos problemas acontecidos na capital chinesa Chang'an e a súa consecuente despoboación.

Dhafmapala comeza o seu mandato no reino de Bengala.

Alpin II sucede a Ciniod como rei dos pictos.

Carlos é informado por Hadriano I de que Arichis de Benevento, o duque de Friuli, o duque Rexinaldo de Chiusi e Hildedrando de Spoleto planean unha insurrección en Italia. Adalxis pretende regresar cunha flota bizantina que ten intención de devolverlle o trono lombardo. Carlos fai campamento de inverno ao pé dos Alpes coa intención de atravesalos cara a península tan cedo como lle sexa posible.

774

representación do rei Silo
historalia

morre Aurelius, sucedido por Silo, un curmán e xenro de Afonso I.

abril, 6: Carlos confirma a 'doazón de Pipino' ao bispo de Roma.

maio: a flota bizantina remonta o Danubio.

xuño, 4: cae Ticinum en mans francas. Carlos proclámase rei dos francos e dos lombardos e leva presos a Desiderio e a Ansa a Gallia, onde son recluídos no mosteiro de Corbie. Tamén captura a Xerperga, da que non se volve saber.

o único territorio controlado por lombardos é o ducado de Benevento. Arechis II chámase 'príncipe dos lombardos'. Volturno cobra importancia como praza de fronteira.

numerosos nobres francos quedan en Italia para certificar a integración dos territorios lombardos baixo a autoridade de Carlos. En Ticinum, Venetia, Istria, Emilia, Toscana, e Corsica.

son sufocadas rebelións en Friuli. Hrodgaud é instalado como duque.

Carlos visita Roma e Hadriano I noméao 'patricius'.

o fracaso militar lombardo non indica debilidade estrutural do seu reino. O aparato administrativo funciona á perfección, por exemplo.

setembro, 1: Carlos inaugura a igrexa da abadía de Lorsch. Pasará o inverno en Ingelheim, onde fai construír un palacio real.

o gobernador abbasí Yazid ibn Hatim reconstrúe a gran mesquita de Kairouan.

espectacular aumento dun 1,2% da cantidade de carbono14, evidencia dalgún fenómeno cósmico excepcional, quizás unha enorme tormenta solar, visible no exame dos troncos de árbores para esta época.

outubro: batalla de Berzitia: o khaghan búlgaro Telerig envía unha pequena expedición (12000) para entrar no sudoeste de Macedonia e capturar Berzitia. Constantino V é informado por espías bizantinos en Pliska e reúne un enorme exército (80000) que sorprende e derrota os búlgaros.

Telerig envía unha mensaxe a Constantino V dicindo que ten que fuxir a Constantinopla a causa da derrota e pídelle a cambio que lle revele o nome dos espías en Pliska para protexelos. unha argucia que descubre e erradica a rede de espías bizantinos.

Alhred, rei de Northumbria, é expulsado de York, a súa capital, a instigación do clero do reino. Parte en barco desde Bamburgh ao exilio a terras de pictos, onde é recibido por Ciniod I. Substitúeo Aethelred I (11 anos), fillo do defunto rei Aethelwald Moll.

os saxóns atacan e incendian a abadía de Fritzlar e asasinan a todos os monxes. Carlos marcha precipitadamente a Austrasia e reúne tropas para contraatacar mais o inverno detén as operacións.

Offa de Mercia somete a Wessex e proclámase rei de 'Inglaterra'.

773

silabario manipuri
www.proel.com.org

paz entre o basileus e os búlgaros.

Paulo Diácono dedica á Adelperga, filla de Desiderio e Ansa, a súa historia romana, versión ampliada da de Eutropius, émula do seu home, ‘case o único príncipe do seu tempo que estimaba o saber’ e ela ‘amante da filosofía e da poesía, a historia e a esexese’. Inclúe historias sobre mulleres, case todas negativas, que poden ter sido un dos intereses coñecidos da dama ou porque Paulo consideraba que respondía ás súas necesidades, advertencia contra a frivolidade das mulleres. Paulo representa a Xustiniano como restaurador do estado. Quizás non é coincidencia que Arichis e Adalperga construíran en Benevento unha igrexa en evidente imitación de Hagia Sophia.

marzo: Hadriano I renova as peticións de axuda a Carlos ante as ameazas e os movementos de Desiderio.

verán: Carlos cruza os pasos alpinos (Mont Cenis) en dirección sur á cabeza dun importante exército franco. Bernardo, tío seu e irmán de Pipino, encabeza outro exército que entra polo Gran Bernardo.

no val de Susa o avance franco vese dificultado polas fortificacións lombardas. A información procedente dos exploradores francos localiza os seus puntos febles e os ataques francos fan retroceder aos lombardos cara Ticinum.

ata novembro Carlos negocia o pago de 14000 solidi a cambio do acordo de Roma e o prezo das dúas princesas lombardas. Desiderio rexeita o acordo.

Ticinum sofre escaseza de alimentos, mais o rei permanece na capital e ordena a seu fillo Adalxis defender Verona para protexer a Xerberga e os fillos de Carlomán.

logo dun asedio curto, Adalxis busca refuxio en Constantinopla.

os francos conquistan Verona e Mortara.

outubro: Ticinum é asediada.

al-Mansur, derrotados os chiies, centra a súa atención en al-Andalus, onde envía un exército que é derrotado por Abd al-Rahman I, que envolve a cabeza do xeneral enviado por Bagdad nunha das bandeiras negras que lles servía como símbolo. O outro único territorio dos que foran controlados polos ummayad que non controla al-Mansur é o territorio dominado por Abd al-Rahman ibn Rustum.

a datación establecida por Victorius de Aquitania aparece nunha carta enviada a Carlos.

os saxóns aproveitan a presenza de Carlos en Italia para recuperar Eresburg e Syburg. Tamén atacan, sen éxito, Büraburg, onde reside un bispo desde tempos de Bonifacio.

Alhred de Northumbria envía legados a Carlos.

o concepto de número '0' chega aos círculos de matemáticos árabes en Bagdad, que basearán os seus números no sistema hindú (os maias xa desenvolveran o concepto había tempo).

morre Khongtekcha de Manipur. Durante o seu mandato escribíronse textos co alfabeto Manipuri.

Yazid ibn Useid es Sulami, wali en Bagdad.

campaña de Constantino V contra os búlgaros, que deben retirarse desde Macedonia ata Lithosoria.

771

ruínas de Sycae
www.youtube.com

Offa de Mercia derrota os haestingas e incorpóraos a Sussex, tributario seu.

os musulmáns atacan e conquistan Sycae, en Anatolia e derrotan un exército de rescate bizantino enviado por Constantino V.

decembro, 4: morre Carlomán (21) a causa dunha hemorraxia nasal en Samoussy, nunha situación de total illamento político. Os seus fillos pequenos e Xerberga, a viúva, deben fuxir onde Desiderio porque Carlos se apodera dos territorios de seu irmán temeroso da influencia do lombardo. Xerperga, a irmá da viúva, é inmediatamente repudiada por Carlos e enviada onde seu pai, sufrindo damnatio memoriae (coa única excepción da mención do seu nome na vita adalhardi). A semellanza de nomes e destinos das súas irmás xustifican a confusión na documentación sobre elas.

Desiderio trata de facer valer os dereitos sucesorios dos seus netos francos ante o bispo de Roma, coa intención de socavar o poder de Carlos.

Carlos casa con Hildegarda, suaba, nun movemento estratéxico que busca consolidar a súa autoridade en territorios anteriormente pertencentes a seu irmán.

lombardos e francos entran en oposición directa e, contrario aos seus plans iniciais, Carlos terá que intervir directamente en Italia.

766

acueduto de Valente, estado actual
http://arquitecl.blogspot.com.es/

maio, 1: Pipino convoca os francos en Orleáns e invade Aquitania, derrotando definitivamente a Waifar.

Paulo I trata de mediar entre Desiderio e Pipino.

agosto, 21: no marco das persecucións iconoclastas, Constantino V obriga a monxes e monxas a casarse publicamente no Hipódromo.

agosto, 25: humillación pública de 19 altos funcionarios e magnates no Hipódromo logo de descubrirse e ser descabezado un golpe contra Constantino V. Os líderes, Constantino Podopagouros (logothetes tou dromou) e Strategios, irmáns, son executados. O resto cegados e exiliados.

agosto, 30: o patriarca Constantino II é deposto e decapitado por conivencia cos iconódulos sublevados e substituído por Nicetas I (novembro, 16).

outono: asedio de Kamacha, onde forzas abbasíes baixo al-Hasan ibn Qahtaba son derrotadas; un exército bizantino (12000 homes) acode e fai retroceder os musulmáns ao interior de Armenia.

turbulencias nas elites búlgaras: Subin, khaghan búlgaro, ten que fuxir e refúxiase na fortaleza bizantina de Mesembria, de onde escapa a Constantinopla; Constantino V logra que tamén escape a familia do khaghan. Umor é sucedido por Toktu como khaghan.

en Bagdad traballan 100000 persoas que completan a 'Cidade Redonda', un círculo amurallado cun diámetro de dous quilómetros, no que o centro está ocupado por un palacio para o califa. Esta cidade está rodeada por tres muros máis.

Constantino V ordena anovar o acueduto de Valente.

en Geisingen, nas proximidades de St. Gallen, un documento fala da elaboración da cervexa.

decembro, 25: Pipino celebra o Nadal en Samoussy.

761

castelo de Lunghezza, nas proximidades de Roma
www.wikiwand.com

batalla de Eildon: Aethelwald de Northumbria somete unha rebelión baixo Oswine, que morre logo dunha batalla que dura tres días.

Bridei V sucede a seu irmán Óengus I como rei picto.

Froila I consagra unha igrexa a Vicente de Lérins en Ovetao, fomentando o asentamento na 'nova' cidade.

finaliza a construción do castelo de Lunghezza, que inclúe 108 cuartos, nas proximidades de Roma.

o califato reconquista Kairouan, obrigando a 'Abd al-Rahman ibn Rustam a marchar cara o oeste, onde funda un estado autónomo con centro en Tihert.

Khurshid II, spāhbed de Tabaristán, suicídase con veleno ao saber que a súa familia foi capturada polos abbasíes.

o sacerdote Dōkyō 'cura' a emperatriz Kōken con oracións e pocións; converténdose no seu favorito, e provocando ciumes e suspicacias do emperador Junnin.

unha gran fame na área do Huai-Yangtze empurra á xente a episodios de canibalismo.

Telets, da liñaxe Ugain, khaghan búlgaro, en sucesión de Vinekh.

maio, 16: execución do monxe iconódulo Pedro o Calibita; Constanino V impón os canons do concilio de Hiéreia, e persegue os que non os aceptan.

760

Offa's Dyke
English Heritage

Constantino V volve invadir territorios controlados polos búlgaros.

Peredus, aristócrata e bispo de Lucca, consagra a catedral; documéntanse numerosas doazóns á igrexa.

Pipino conquista Carcassone, Tolosa, Rodez, e Albi. Waifer de Aquitania confisca as terras da igrexa e saquea Borgoña. Pipino resposta invadindo Berry e Auvernia e capturando Bourbon e Clermont. Os vascos que combaten con Waifer son aniquilados e os superviventes son deportados ao norte xunto coas súas familias.

abril: o duque Autchairo e o bispo Remedius, legados de Pipino, asinan un acordo con Desiderio. Paulo I renuncia ás súas reivindicacións territoriais, así como ás súas intencións de influencia Spoleto e Benevento.

maio, 20: os rexistros falan do cometa Halley.

batalla de Hereford: os britanos de Brycheiniog, Gwent, e Powys derrotan a tropas de Mercia baixo Offa, liberándose da súa influencia.

Offa ordena construír un dique (240 kms de lonxitude) de terra, que marca a fronteira entre anglo-saxóns e britanos.

Xuan Zong é arrestado polo oficial eunuco Li Fuguo, que segue ordes do emperador Su Zong e é nomeado comandante da garda imperial.

DosPilas é abandonada logo dunha sublevación vitoriosa de Tamarindito e Petexbatún.

Froila I derrota continxentes musulmáns en Callaecia.

Aethelred I, rei de East Anglia.

eruditos musulmáns adoptan a numeración hindú e desenvolven conceptos de álxebra e trigonometría.

759

representación de Narbo Martius
www.jeanclaudegolvin.com

batalla do paso de Rishki: Constantino V envía tropas a Thracia novamente, mais sofren emboscadas e son derrotadas mentres cruzan o paso, nas proximidades de Stara Planina. Vinekh, khaghan búlgaro non aproveita a situación e inicia negociacións de paz.

asedio de Narbo: Pipino toma a cidade logo de sete anos de asedio; fai retroceder os musulmáns alén dos Pireneos. O comes godo Milo asume o goberno da cidade.

xullo, 24: Oswulf de Northumbria é asasinado por cortesáns en Weighton; Aethelwald Moll, patricio de Deira, probablemente instigador, é coroado rei.

outubro, 1: iníciase un inverno excepcionalmente intenso en occidente, con ríos xeados moi cedo. As baixas temperaturas duran ata febreiro.

al-Mansur inicia a conquista de Tabaristan, na costa sur do Caspio. Khurshid II, foxe ás montañas á fortaleza de Daylam.

forzas tang baixo Guo Ziyi asedian Yanjing, no norte; os combates acentúan a escaseza de comida e acaba por comerciarse con ratas, que alcanzan prezos desorbitados.

756

Abd al-Rahman I
www.pinterest.com

xaneiro: An Lushan, ao mando dun exército de 200000 homes conquista Luoyang, que Feng Changging non pode defender. Os rebeldes cruzan o río Amarelo e marchan para capturar as cidades de Chenliu e Yingyang.

batalla de Yonggiu, un continxente tang de 2000 homes baixo Zhang Xun defende con éxito a súa fortaleza contra o exército rebelde. Zhang logra unha vitoria logo dun asedio de catro meses e impide que os rebeldes se apoderen do territorio fértil ao sur do río Huai.

febreiro, 5: An Lushan proclámase emperador en Luoyang, establecendo o Gran Yan; avanza cara a capital tang, Chang'an, e decide apoderarse do sur para interromper o fluxo de reforzos leais aos tang. Mentres, numerosos soldados se unen á rebelión.

Constantino V constrúe fortificacións no limes do Danubio e comeza a instalar armenios e sirios no thema de Thracia. En resposta Kormisosh, khaghan do imperio búlgaro, demanda o pagamento de tributos. Constantino négase e os búlgaros chegan ata os muros de Anastasio, moi próximos á capital.

batalla de Marcellae: Constantino V envía unha forza expedicionaria (500 naves e 6000 soldados) a Thracia, que derrota os búlgaros, nas proximidades da fortaleza de Markeli, no delta do Danubio. Kormisosh é forzado a aceptar o tratado e confirma a fronteira existente.

as consecuencias no campo búlgaro son graves e o khaghan é deposto e substituído por Vinekh, do clan Vokil.

Aistulfo volve ameazar Roma, que pretende facer capital lombarda, mais Pipino intervén novamente, tamén coa presenza de Carlos e Carlomán, e establece os 'estados papais' (incluíndo Ravenna e a Pentapolis) en favor de Estevo II.

Galla Gaulo é deposto, cegado e exilado; sucédeo Domenico Monegario, como sexto dogo de Venecia.

batalla de Newanbirig: Óengus I, picto, e Eadberht de Northumbria atacan a Dumnagual III de Strathclyde no castelo de Dumbarton; sen embargo, son aniquilados posteriormente, probablemente por britanos.

Cuthred de Wessex morre logo de reinar 16 anos; sucedido por Sigeberht, parente.

maio, 15: Abd al-Rahman I captura Hispalis sen violenza. Derrota a Yusuf ibn 'Abd al-Rahman al-Fihri nunha batalla polo control de al-Andalus e establece un emirato independente, do que se proclama emir. Acaba coa autonomía de Teodomiro en Murcia.

maio: Xuan Zong contrata 4000 mercenarios musulmáns para contribuír á defensa de Chang'an contra os rebeldes. As forzas leais toman posicións defensivas nos pasos montañosos, mais o chanceler Yang Guozhong ordéalles abandonar as súas posicións. An Lushan aplasta as forzas tang, quedando a capital indefensa.

xullo, 14: Xuan Zong foxe coa corte imperial cara Sichuan ao avanzar os rebeldes polo paso de Tongguan cara a capital; An Lushan cae enfermo, quizás por causa dunha diabetes. Queda case cego e sofre de extrema irascibilidade.

xullo, 15: Xuan é obrigado pola Garda Imperial a executar a súa favorita Yang Guozhong; tamén consente que os eunucos estrangulen a Yang Guifei. An Lushan tamén ordena executar outros membros da familia imperial.

agosto, 12: Xuan Zong abdica do trono logo dun reinado de 44 anos; é sucedido polo seu fillo Su Zong como emperador da dinastía Tang, que contrata 22000 mercenarios musulmáns para reforzar o exército diezmado en Lingzhou.

Ibn al-Muqaffa', escritor e pensador musulmán, é torturado en Basra por orden de al-Mansur, sendo desmembrado e arroxado, inda vivo, a un forno aceso.

decembro: Aistulfo morre nun accidente de caza. Ratchis tenta volver ao trono.

754

representación da coronación de Pipino o Breve
biblioteca Xenoveva, ms 782, fol. 107
www.fr.wikipedia.org

xaneiro, 7: Estevo II chega a Chalons, onde Pipino. Acode a recibilo ao camiño Carlos (12 anos), o seu fillo maior.

febreiro, 10: concilio de Hiereia, Constantino V, indignado pola actitude de Roma e a súa alianza cos francos, e perdida a esperanza de recuperar Ravenna, convoca un novo concilio onde se ratifican as teses iconoclastas. Roma négase a enviar representante. Só acoden bispos de territorios dominados polo imperio; establécese que as iconas son contrarias ás escrituras e simplifícase máis o culto. Xoán Damasceno é declarado herexe.

os monxes opóñense, mais o emperador toma medidas drásticas contra eles; péchanse mosteiros e confíscanse propiedades; obrígaos a levar traxes correntes, moitos son encerrados e outros obrigados a exiliarse; algúns son obrigados a casar e son obxecto de escarnio por parte da xente; incluso algúns son executados.

abril, 14: a reunión anual dos francos acepta loitar en Italia.

xuño, 5: Bonifacio atopa en Dokkum un grupo de frisios pagáns que o martirizan á vella usanza.

xuño, 10: morre o califa, sendo sucedido por al-Mansur, que rompe cos chiíes, temeroso do descontento sunní, o que ocasiona unha revolta baixo Muhammad, bisneto de Hassan, que aspira ao califato.

xullo, 28: Pipino é unxido e coroado novamente en Saint-Dennis, mais agora polo bispo de Roma.

Estevo tamén unxe a Carlos e a seu irmán Carlomán (3 anos); outorga a Pipino o título de patricius romanorum, igual que sucedera séculos antes con Clovis, coa intención de que se converta en protector de Roma.

agosto, 8: Constantino II (de Sylaeum) sucede a Anastasius como patriarca de Constantinopla.

outubro, 14: Pipino esixe a Aistulfo que lle entregue todos os territorios que pertencían ao exarcado. Aistulfo só garante o regreso seguro de Estevo II a Roma.

Aistulfo logra que Carlomán, irmán de Pipino, decida saír do seu retiro en Montecassino, para volver a territorio franco e alzarse contra o política de seu irmán; sen embargo, este é interceptado e encerrado nun mosteiro en Vienne, onde é executado (decembro, 4 - agosto, 17).

751

Childerico III é tonsurado, do libro
L'Histoire de France Populaire, Henri Martin, 1876.

Constantino V derrota os musulmáns en Melitene.

Aistulfo toma Ravenna, final do exarcado. Aistulfo centra agora a súa atención sobre Roma, que volve pedir axuda a Constantinopla, sen éxito.

unha embaixada franca chega a Roma. Formulan unha pregunta: é xusto que unha persoa sen autoridade sexa chamado 'rei'? non será mellor que leve o título quen realmente goberna?'. Zacarías resposta, coa debida cerimonia, afirmativamente.

xuño, 6: o fillo de Constantino V é coronado basileus como León IV; pouco despois morre María, segunda muller de Constantino.

xullo/agosto: os chineses, baixo Gao Xianzhi, son derrotados polos árabes, axudados por tribos turcas coaligadas, onde o río Talas.

é posible que os prisioneiros chineses feitos difundan no ámbito musulmán o uso do papel, que comeza a producirse en Samarcanda.

concilio en Constantinopla (o sétimo xeral segundo os ortodoxos): confirmación das teses iconoclastas.

novembro: Childerico III é tonsurado, desposto e recluído nun mosteiro.

morre Xisulfo, duque de Benevento, sucedido por Liutprando, fillo seu; Scauniperga, súa nai, exerce a rexencia.

unha terrible tormenta destrúe máis de mil barcos no Yangzhou.

750

as-Saffah proclamado califa
en.wikipedia.org

xaneiro, 25: Marwan II é derrotado xunto ao río Zab. Á batalla segue a persecución e matanza sistemática de toda a familia umayyad. Marwan foxe cara Exipto, coa intención de chegar a al-Andalus, onde inda hai grandes continxentes militares leais. Tamén logra escapar Abd al-Rahman, neto de Hisham, que se oculta en Ifriqiya.

Kufa pasa a ser capital. Os abasí non recoñecen os umayyad como califas; só lles outorgan o rango de reis.

o emir de al-Andalus Yusuf nomea a Sumayl gobernador de Caesaraugusta. No norte declárase unha enorme peste e moitos bérberes emigran cara o sur, o que ocasiona despoboamentos na Meseta.

Afonso I, secundado por Fruela, un irmán, ataca as cidades do norte matando musulmáns e levando consigo poboación cristiá. Isto agrava o despoboamento na zona.

Aistulfo ataca o exarcado de Ravenna. Zacarías revive a situación de emerxencia de tempos de Gregorio III anos antes: a iconoclastia afástao de Constantino V. Busca o auxilio franco.

Pipino acepta negociar con Zacarías.

os toltecas saquean Teotihuacan, reducida a ruínas.

agosto, 5: Marwan II é capturado e asasinado en Fostat por partidarios de Adbullah ibn Muhammad as-Saffah. O seu corpo é mutilado polo populacho.

sublevación copta en Exipto en contra dos impostos.

fúndase o imperio de Ghana.

Eadberht de Northumbria encerra a Cynewulf, bispo de Lindisfarne, no castelo de Bamburgh. Asedia o príncipe Offa, fillo do rei Aldfrith, tamén en Lindisfarne, quen finalmente, case morto de fame, decide renderse, sendo inmediatamente executado.

batalla de Mugdock: os britanos de Strathclyde baixo Teudebur derrotan os pictos baixo o príncipe Talorgan. Este feito inicia o comezo do rei Oengus I.

747

capa do libro 'Odoario o Lugo no século VIII'
www.tococolección.net

Odoario de Lucus funda o mosteiro de Estevo de Atán (en Pantón) e morre logo de testar.

supostamente, regresara do cativerio en Ifriqiyya grazas a Afonso I, que o rescatara a cambio de numerosos reféns. Reinstalado na súa sé, reedifica a cidade, arrasada polos musulmás e entrega villae a compañeiros e 'familiares' (Guntín por Guntino, Destriz por Desterigo, Vila Cendoy por Sendón, Mazoy e Macedon por Macedonio, Vilamarce por Marco, Framil por Framiro, Ramil por Ramiro e Agari por Agarico; tamén se ten deducido Lalín por Lalinus, quizás sen fundamento).

deixa á igrexa o señorío de Lucus, “que restaurei dende as súas raíces ... e as vilas que agora direi e adquirín por dereito de ocupación e poboei con parentes e familiares meus” e nomea, entre outras, “en Ventosa a igrexa de Mamede de Trabancas e Andrés de Orrea; en Deza Xoán de Palmou, María de Bermés e Xoán de Botos; a igrexa de María de Trasdeza, que chaman Pedre”.

o documento está refrendado por Afonso I e é un título 'dotal' (scriptura dotis), requisito previo para fundar ou restaurar unha igrexa.

Yusuf é nomeado emir de al-Andalus, que ten que combater contra rivais nas mesmas portas de Córdoba.

a peste chega a Constantinopla por Monemvasia. Constantino V destrúe a flota árabe fronte a Chipre coa axuda das cidades italianas, poñendo fin á supremacía naval musulmá.

xuño, 9: revolución abásida: Abu Muslim Khorasani, lider militar que ten como símbolo un estandarte negro, inicia en Marv (Turcomenistán) unha revolta contra os umayyad. Ten ás súas ordes case 10000 homes.

agosto,15: abdica Carlomán, quizás inducido por Bonifacio, á súa vez influído por Pipino. Peregrina a Roma e profesa alí nun mosteiro, sendo tonsurado por Zacarías, e logo en Montecassino. Confía as tarefas de goberno ao seu fillo Drogón baixo a rexencia de Pipino. Griffon é liberado a petición de Carlomán.

Gao Xianzhi, un coreano ao servizo dos Tang, derrota os musulmáns e tibetanos con rápidas incursións militares a través do Pamir e o Hindu Kush. Arredor de 72 pequenos principados hindús e na Sogdiana fanse vasalos dos Tang.

Xuang Zong elimina a pena de morte en China.

746

Tegernsee, vista da abadía bieita dende o lago
en.wikipedia.org

xaneiro, 18: tremor de terra en Galilea, que destrúe Capharnaum.

Constantino V invade Syria aproveitando os enfrontamentos no califato e toma Germanikeia. Organiza o reasentamento de poboación cristiá en Thracia.

os alamanos volven a rebelarse e Pipino vólveos derrotar.

concilio de Cannstatt, onde Carlomán convoca os nobres alamanos, arresta a maioría e execútaos por traidores; isto supón o final da independencia do ducado, dende agora dirixido por condes e duques nomeados polos francos.

Ratchis codifica as leis lombardas, en latín.

morre Saelred de Essex, sendo sucedido por Swithred, neto de Sigeheard; coma os seus predecesores está sometido a Mercia.

batalla de Kafartuta: Marwan II derrota e mata a al-Dahhak ibn Qays al-Shaybani, lider dos khariitas, ao norte de Mesopotamia; os rebeldes que sobreviven refúxianse alén do Tigris.

Jayshikhari Chavda establece a dinastía Chayda en Gujarat.

o mosteiro bieito de Tegernsee comeza a elaborar a súa propia cervexa.

o sacerdote zoroastriano Bihafarid subleva Khorassan contra os musulmáns.

a peste cébase en Sicilia e o sur de Italia.

743

representación de Childerico III
www.datuopinion.com

febreiro, 6: Hisham ibn Abd al-Malik morre; sucédeo o seu fillo al-Walid II, que mete preso a Khalid al-Qasri, anterior gobernador de Iraq; faino torturar polas súas crenzas contrarias ao islam.

marzo, 1: concilium germanicum de Leptines: primeiro gran sínodo celebrado no leste dos territorios francos, organizado por Carlomán e presidido por Bonifacio, xa consolidado na súa posición de líder da igrexa franca. Son prohibidas as prácticas máxicas e astrolóxicas; institúese a precaria verbo regis, que regula a práctica da confiscación de bens eclesiásticos; condena de crenzas e cerimonias como a vince luna ('lúa, túa é a vitoria'): o clero apóiase no opúsculo natura rerum (Isidoro) para explicar 'cientificamente' os eclipses lunares, e debe loitar para que se asente a noción da muller como ser humano e non cósmico; precísase que algúns cren que 'as mulleres entréganse á lúa para facerse co corazón dos homes igual que facían os pagáns'. A muller segue a ser 'considerada' como misterio, ora benéfica ora maléfica, orixe de pracer e desgrazas, pureza terrorífica mais tamén impureza destrutiva.

marzo, 3: para lexitimar a súa posición Pipino saca dun mosteiro a Childerico III 'o estúpido', suposto 'fillo' de Chilperico II e faino rei.

abril, 1: Zacarías responde a Bonifacio, que se queixa do estado 'deplorable' dos cregos, que non coñecen o latín e viven en concubinato.

a poesía chinesa pasa por unha idade dourada; destacan Li Bo e Du Fu.

morre Teodomiro, o godo que inda conservaba a súa autonomía no SE de al-Andalus, sendo sucedido polo seu fillo Atanaxildo.

o sistema de anotación de Victorius de Aquitania inda funciona en Britannia, onde se elabora unha listaxe dos reis de East-Anglia, con dobre datación: a de Victorius e a de Dionisio.

primavera: Pipino e Carlomán atacan os eslavos, saxóns e alamanos baixo os duques bávaro Odilo e alamano Theudebald, que foxen logo de ser derrotados en Lech.

Aethelbald de Mercia e Ceolred de Wessex atacan xuntos os reinos britanos de Gwent e Powys.

nova revolta en Kufa.

verán: Artabasdos é novamente derrotado por Constantino V, agora recoñecido como basileus. O usurpador e o seu fillo Niketas son cegados en público e encerrados no mosteiro de Chora.

Constantino prosegue a súa política iconoclasta. Tamén reforma a 'Garda Imperial' e converte os efectivos en unidades de elite de cabalería e infantería chamadas tagmata; usa estas tropas en campañas contra unha rebelión interna no NO de Anatolia e para campañas ofensivas contra atacantes musulmáns e búlgaros.

xuño, 29: entrevista de Ticinum entre Zacarías e Liutprando, quen se ten beneficiado das disensións entre Roma e os bizantinos. Mais o bispo de Roma apoia, a petición do exarca, que o lombardo acorde unha paz co imperio.

Odilo de Baviera axuda a Boruth, knyaz dos carantanios, contra os ataques avaros. A cambio, Boruth acepta a súa soberanía e faise cristián.

Shōmu muda a lei da 'propiedade perpetua das terras de cultivo', o cal permite que aristócratas e cregos cultiven a terra: as novas terras chámanse shoin.

Pipino e Carlomán emprenden unha reforma eclesiástica reflectida nas 'capitularia': cada cidade debe posuír un bispo e todos os cregos da diocese deben prestarlle obediencia; monxes e monxas deben ter autorización para vivir fóra das súas congregacións; deben retornarse as posesións detraídas á Igrexa; os metropolitanos son restaurados nas súas funcións; os cregos deben acudir aos sínodos provinciais; os cregos fornicadores e os adúlteros deben cumprir penitencia.

742

reconstrución de Chang'an
www.city-data.com

Liutprando segue ameazando Roma pero Zacarías pacta con el e ofrécelle a súa axuda contra os duques de Spoleto e Benevento.

a situación de Pipino en Neustria é precaria debido á súa orixe austrasiana.

marzo: Hunald I, duque de Aquitania e Vasconia, en rebeldía dende a morte de Carlos, é atacado por Pipino e Carlomán en Bourges; destrúen tamén o castelo de Loches. Hunald non se somete mais non é quen de evitar que arrasen o país.

derrotado Hunald, Pipino e Carlomán atacan e someten os alamanos, dirixidos polo duque Theudebald.

abril - maio: o gobernador de Exipto Handhala ben Safwan intervén no Maghreb contra os bérberes kharidjitas rebeldes e derrótaos en dúas batallas en al-Qarn e el-Asnam (Chlef en Alxeria) despois de ser atacada a propia Kairouan polos rebeldes.

maio: vitoria de Constantino V sobre Artabasdos, que se refuxia en Constantinopla.

agosto: tratado de Terni entre Zacarías e Liutprando, polo que o lombardo retorna posicións conquistadas en 739.

outubro, 1: Chrodegang, vello chanceler de Carlos Martelo, é nomeado bispo de Metz.

Teodato Ipato, dogo de Venecia, logo da morte de seu pai Orso, transfire a sé ducal de Eraclea a Malamocco.

os eslavos combaten os francos, aliados cos bávaros.

Trasamundo é desposuído por Liutprando e recluído nun mosteiro.

Xisulfo II, duque de Benevento.

Hisham permite ocupar a sé de Antioquía logo de corenta anos vacante; o elixido leva o nome de Estevo IV.

Abd al-Malik ibn Katan al-Fihri, wali de al-Andalus, suprime a rebelión bérber na rexión de Mértola.

Xuan Xong comeza a favorecer o taoísmo en detrimento do budismo, adoptando o título de tianbao ('tesouros celestiais'); o número total de homes alistados no exército medra ata medio millón debido ás reformas militares efectuadas.

o censo conservado para Chang'an e a súa área metropolitana de Jingzhou indica 362921 familias rexistradas cun total de 1960188 persoas.