525

www.labrujulaverde.com

Probus e Philoxenus, cónsules.

tremor de terra en Constantinopla.

febreiro, 5: morre Avitus de Vienne.

febreiro, 5 &6: o concilio de Carthago reorganiza a igrexa de Africa, logo das últimas persecucións.

Teodorico envía a Xoán I a Constantinopla co obxectivo de negociar co emperador unha suavización da política relixiosa contra os arianos. Xustino recibe o papa con todos os honores e incluso fai que o coroe pero da política relixiosa non se trata.

os persas penetran en Iberia, que é conquistada, pese á oposición dun pequeno exército enviado por Xustino.

en Britannia (norleste) Bernicias cae en mans anglosaxonas.

Boethius e o seu sogro Quintus Aurelius Memmius Cassiodorus son axustizados en Ticinum, probablemente.

unha terrible inundación a causa do río Daisan, tributario do Éufrates, destrúe Edessa, en Syria, en dúas horas, excepto as partes altas. Durante os traballos de reconstrución da cidade atópase o máis tarde denominado ‘sudario de Turín’.

Dionisio o Exiguo, monxe escita residente en Roma, propón iniciar a conta dos anos co nacemento de Xesús (en realidade tería nacido en 7 a.C.). Iníciase a conta denominada a.D. tamén elabora as táboas para calcular o ‘cyclus paschalis’.

o arquitecto Antemio de Tralles ‘atopa’ o foco dunha parábola matemática.

tremor de terra en Cilicia: Anazarbus resulta destruída. Xustino I reconstrúe a que sería a súa cidade natal, que pasa a ser Xustinopolis. Antioquía, Seleucia en Syria e Constantinopla tamén se ven afectadas.

tropas de Clotario I atacan territorios burgundos.

Kaleb, rei de Aksum, reúne unha flota, coa colaboración de Constantinopla, e ataca Iemen, coa pretensión de establecer portos seguros no mar Vermello.

Cosmas Indicopleustes, explorador e xeógrafo de Alexandría explora o Nilo. Chega ata Sri Lanka, faise monxe e escribe Topographia Christiana para defender a historia bíblica do mundo.

en Iucatán, os itzáes fundan a cidade maia de Chichén Itzá.

524

Iustinus e Opilio, cónsules.

maio, 1: Sexismundo é executado en Aurelianum; tamén a súa muller e os fillos. Seica acaban no fondo dun puzo.

o irmán de Sexismundo, Gundemaro II, asume o mando burgundo, agrupa as forzas burgundas e busca axuda ostrogoda.

xuño, 25: os francos son derrotados polos aliados en Veseruntia; sen embargo, o rei franco Chlodomiro morre na batalla.

Clotario I casa á forza coa viúva de Chlodomiro, Guntheuc e mata os fillos de seu irmán, excepto Chlodoaldo, que pode escapar a Provenza pero non tenta facer valer os seus dereitos ao trono; dedícase á vida relixiosa e funda un mosteiro.

Clotario I e Childeberto I repártense os territorios de seu irmán (Childeberto Carnutum e Aureliani, Clotario Turonensis e Pictavia).

Nubia está dividida en varios ‘reinos’: ao norte Nobatia (entre a 1 e a 3 cataratas do  Nilo) con capital en Paras; ao sur Markuria, con capital en Dongola. Inda máis ao sur Alodia, con capital en Soba.

os abisinios esténdese cara Nubia e agora, baixo Kaleb, lánzase a conquistar novamente Iemen, en teoría para axudar a poboación cristiana perseguida polos reis de Himyar.

Xustino decreta medidas contra o arianismo, que aristócratas italianos tamén queren instaurar en Italia. Teodorico dera facilidades ao catolicismo e síntese traizoado ao comprobar que non valeran de nada. Fai asasinar algúns aristócratas acusados de traizón. Boethius defendera a un dos acusados, o senador Albino, resultando el mesmo inculpado e torturado ata morrer.

concilio en Ilerda.

a brecha entre a aristocracia senatorial con base en Roma e os partidarios do goberno godo en Ravenna é cada vez maior. Os anos finais de Teodorico son anos de persecución do culto católico, en represalia ás medidas orientais contra os arianos.

decembro, 1: morre Ahkal Mo’Naab’ I de Palenque, que estará varios anos sen gobernante.

523

es.wikipedia.org

Flavius Anicius Maximus, cónsul único.

o Coliseo presenza os últimos xogos con animais organizados por Flavius Anicius Maximus, en celebración do seu consulado, prohibidos posteriormente por Teodorico.

Casiodoro sucede a Boethius coma magister officiorum: “para o monarca ti [Casiodoro] fuches un bo xuíz e un íntimo ao que honrou. Pois cando se liberaba dos seus deberes oficiais buscaba a túa conversa para saber os preceptos dos sabios, para emular os grandes homes do pasado. Sempre curioso, quería saber sobre o curso das estrelas, as mareas do mar, e fontes lendarias, para que o seu estudo da ciencia natural lle fixera parecer un auténtico filósofo purpurado (Variae, 9.24.8).

Clotario I, Chlodomiro e Childeberto I aproveitan a ameaza que supoñen os preparativos de Teodorico e invaden territorio burgundo, derrotando a Sexismundo e seu irmán Gundemaro II.

Sexismundo é traizoado, capturado e trasladado a Aurelianum por Chlodomiro. Teodorico queda con algúns territorios e recupera o tesouro visigodo que capturara Gundobado, e retírase da guerra, que continúa entre francos e burgundos.

Sabbatius casa con Teodora.

maio, 6: morre Trasamundo, sucedido por Hilderico (probablemente 60 anos), fillo de Hunerico e Eudocia; pasara ata os corenta en Constantinopla e era romano culturalmente. Decreta a liberdade de culto para católicos e establece boas relacións Oriente.

agosto, 13: Xoán I sucede a Hormisdas.

continxentes bereberes saquean Lepcis Magna, que quedara sen defensas; Gaiserico ordenara derrubar as murallas das cidades para evitar rebelións dos romanos.

unha revolta estalla nas seis cidades fronteira no norte do reino Wei: fortes tensións entre a elite e clan Tuoba desestabilizan moito o estado.

a pagoda Songyue complétase durante a era Wei.

Seong, rei de Baekje, un dos tres reinos de Korea.

522

representación de Boethius escribindo no cárcere
letra inicial dun códice medieval
www.catecismo.com.ar

Simmacus e Boethius, cónsules.

tropas de Teodorico toman Aosta.

Amalarico (20) é declarado maior de idade e rei dos visigodos con plenos dereitos. Os burgundos ameazan os seus territorios desde o norte.

morre Eutarico, xenro e sucesor de Teodorico.

Boethius é apresado en Ticinum por orden de Teodorico, que o acusa de conspirar contra o réxime.

na cadea, Boethius escribe a súa obra máis famosa: Consolación da Filosofía, un diálogo entre autor e filosofía, representada coma unha deusa que acude a consolalo.

o reino etíope de Aksum controla parte de Iemen, pero Yusuf Dhu-Nuwas faise coa xefatura do reino Himyarita e ataca as tropas aksumitas en Zafar, captura a cidade e queima as igrexas. Trasládase a Najran, unha fortaleza askumita e logo de aceptar a capitulación masacra a poboación cristián (algunhas fontes falan de 20000 persoas).

chegada masiva artesáns coreanos ás rexións de Osaka e Nara.

morren Garan Erilich, rei picto e Liu Chie, escritor chinés.

521

www.doaks.org

Sabbatius e Valerius, cónsules.

Ecclesius, bispo de Ravenna.

febrero, 2: Xustino instaura a festa da hypapante (a candelaria).

febreiro, 22: Samson de Dol, bispo en Bretaña.

xullo, 17: morre Enodio de Ticinum (42).

Ma’adikarib Ya’fur, apoiado polos Askumitas, comeza unha campaña militar contra as tribos árabes.

Boethius introduce no oeste a anotación musical grega.

novembro, 29: morre Xacobe de Serugh, poeta e teólogo sirio.

520

Boethius
www.wikipedia.de

Rusticus e Vitalianus, cónsules.

Teodorico nomea a Boethius magister officiorum; é un home de ciencia, un helenista que traduce obras de Aristóteles ao latín e trata de atopar vías de comunicación entre este autor e Platón.

Teodorico ordena a construción en Ravenna do templo de Vital e do que se denominará ‘mausoleo de Teodorico’.

morre a filla de Teodorico casada con Sexismundo, rei burgundo, que casa coa filla de Theuderico de Austrasia. Esta muller intriga contra Sixerico, fillo da primeira muller e acúsao de conspirar contra seu pai. Sexismundo estrangúlao. Teodorico decide vingar a morte de seu neto e forxa unha alianza co resto de fillos de Clodoveo.

febreiro, 20: Epifanio, patriarca de Constantinopla.

morre Hormisdas, sucedido por Xoán I.

xullo: Vitalianus é asasinado. Sabbatius xa cansara das súas continuas exixencias.

                                                

tropas de Trasamundo, rei vándalo, son derrotadas por un tal Cabaon, xefe de cameleiros.

polo que se pode deducir de Casiodoro (Variae III, 35) Rómulus Augústulus inda vive no seu retiro.

Prisciano, gramático latino, escribe institutiones grammaticae en Constantinopla. codifica este manuscrito en 18 volumes, que serán amplamente usados posteriormente. Será a base da gramática especulativa.

Sana’a, capital dos himjaritas.

Pabo Post Prydain, rei dos Pennies (norte de Britannia), abdica e divide o reino entre dous fillos. Retira a Anglesey coma ermitán.

East Anglia xorde como configuración política (actuais condados de Norfolk e Suffolk e quizás a parte leste dos Fens)

Budicca II retorna a Cornualles e reclama a xefatura britana.

Bodhidharma, monxe budista, chega a Luoyang e viaxa ao reino Wei do norte, ao mosteiro shaolin.

519

Casiodoro
www.wikipedia.es

Xustino e Eutarico, cónsules.

Casiodoro compón unha oración en honra de Eutarico, nomeado sucesor de Teodorico. Escribe tamén a historia gothica, parece que a petición de Teodorico, na que originem gothicam historiam fecit esse romanam. Este tipo de documentos non mostra necesariamente a súa aposta política polos godos; formaba parte do seu ‘traballo’ como funcionario. Outros, como Enodio ou Boethius, non partidarios dos godos, compuxeron escritos que os deixan quedar en bo lugar.

as igrexas de Roma e Constantinopla chegan a un acordo: papa e patriarca asinan o ‘formulario de Hormisdas’, que recoñece a unidade da igrexa. O emperador concordaba e teoricamente tamén Teodorico; sen embargo, o rei comezaba a inquietarse pola actitude cada vez máis hostil de Oriente e a poboación italiana contra o arianismo godo.

unha multitude queima a sinagoga de Ravenna, pero Teodorico ordena á cidade a súa reconstrución cos seus propios fondos.

Xacobe de Serugh faise bispo de Batnan.

en Hibernia, créase a diocese de Kildare.

aparece o gaoseng zhuan, compilación de biografías de monxes budistas.

510

satélite Aryabhata, primeiro da India,
en honor do matemático e astrónomo
es.wikipedia.org

Teodorico promove que o seu amigo Anicius Manlius Severinus Boethius, filósofo, sexa cónsul para o ano.

Teodorico defende que Amalarico (doce anos) é o lexítimo herdeiro ao trono visigodo. Envía a Teudis a Hispania, que fai fuxir a Xesaleico e proclama a Amalarico. Teudis actúa como rexente en nome de Teodorico. Xesaleico refúxiase con Trasamundo, o rei vándalo.

Teodorico levanta o asedio franco a Arelate, defendida polos locais e a axuda do xeneral ostrogodo Ibbas. Os godos conquistan Provenza e consolidan o seu predominio na rexión.

Wacho asasina a Tato e faise rei dos lombardos. Pouco despois envía tropas a través do Danubio e conquista Pannonia ata o Drau.

conflito aberto entre Gauten e Svear en Escandinavia.

Bahnugupta é derrotado polos hephtalitas comandados por Toramana e debe fuxir cara Bengala. Os hephtalitas conquistan Cachemira e Punjab, co que o reino Gupta comeza a esfarelarse.

o matemático e astrónomo hindú Aryabhata desenvolve unha sistema de cálculo conocido como código Aryabhata. Un dos seus conceptos de ecuacións matemáticas explica a rotación da terra arredor do seu eixo. É un concepto avanzado para o seu tempo e el é moi preciso na súa descrición. Tamén idea moitas outras ideas sobre o sistema solar pero moitas son erradas porque considera que a terra é o centro do universo, non o sol. Aryabhata pasa por ser quen ideou o número ‘cero’ e o usou como parámetro de substitución.

Britannia: batalla de Llongborth, Budic II busca refuxio logo da batalla na corte de Aergol Lawhir en Dyfed (Gales).

Caleb, rei de Aksum, sucede a seu pai Taziena.