604

Shōtoku Taisi
flanqueado por Eguri (irmán)
e Yamashiro (primoxénito)
en.wikipedia.org

marzo: morre Gregorio I, o primeiro bispo de Roma enérxico desde Xelasio I. Os  beneditinos aumentan o seu poder fronte os bispos. Non é un gran teólogo pero inflúe na doutrina en anos posteriores: anxos e demos, purgatorio, penitencia, milagres, reliquias, …; regula o canto nos mosteiros (‘canto gregoriano’, inda que non se refire ao desta época, chamado realmente ‘romano antigo’, que caeu en desuso no s. XIV mentres o ‘canto gregoriano’ aparece realmente un século despois de Gregorio I.

Gregorio I reorganiza a administración eclesiástica partindo de que a Igrexa é a maior forza económica de Italia: pode recrutar tropas, restaurar os acuedutos da cidade e repartir comida entre a poboación de Roma, co que se converte no verdadeiro xefe da cidade, inda recoñecendo a autoridade teórica do exarca.

os xuízos sobre el son diversos – Jortin: ‘destacable por moitas cousas – por exaltar a súa autoridade, desprezar a cultura humanística e a literatura, queimar obras clásicas, protexer a ignorancia e a estupidez, perseguir herexes, bailarlle a auga a príncipes execrables, relatar unha manchea de mentiras absurdas, monstruosas e ridículas (os milagres); un prelado ambicioso e insolente baixo a máscara da humildade’; Draper: non só prohibe o estudo dos clásicos, mutila estatuas e destrúe templos, senón que ‘queimou a biblioteca Palatina, fundada por Augustus’; Gibbon: ‘mestura de simplicidade e astucia, de orgullo e humildade, sentido común e superstición’, dubida que fora responsable deste feito.

Gregorio non parece ter sido afeccionado ao viño e as mulleres, como outros papas pero era moi orgulloso e ambicioso. Exemplo son as felicitacións a Phocas, logo de que este masacrara a familia de Mauricio, simplemente porque o usurpador beneficiaba a súa política. Isto demostra a súa falta de escrúpulos.

abril, 7: o príncipe Shōtoku Taisi, rexente, promulga a "constitución dos dezasete artigos", que vincula o budismo coa ética confucianista, e demanda harmonía nas relacións humanas; tamén manda construír numerosos templos budistas e favorece a chegada de numerosos libros e ideas de China. O rexente tamén constrúe vías de comunicación postais e fai que se escriban importantes crónicas.

Xapón inicia un proceso de transformación nunha monarquía de vasalaxe: creación do título de tennō.

maio, 26: morre Agostiño de Canterbury e Laurencio sucédeo como arcebispo de Canterbury.

os avaros reagrúpanse logo de ser case destruídos e a guerra persa fai que Phocas poida destinar poucas tropas a conter o problema nos Balcáns.

agosto, 13: Sui Yangdi asasina e sucede a Sui Wendi, seu pai, (63 anos) como emperador.

Cosroes II logra tomar posicións bizantinas ao leste do Éufrates e destruír, entre outras, a fortaleza de Dara.

Aethelfirth de Northumbria invade Deira e mata a Aethelric. O príncipe, fillo do rei Aella de Deira, quizás sobriño de Aethelric, foxe á corte do rei Iago de Gwynedd (NO de Gales).

Saeberht, sucesor de Sledda, pai seu, como rei de Essex. Aethelberht de Kent, tío seu, logra que se bautice. Fúndanse os bispados de Londres (o primeiro bispo é Mellitus) e Rochester (Justus, primeiro bispo).

setembro, 13: Sabinianus, novo bispo de Roma, recoñecido por Phocas. Caracterízao a avaricia e a crueldade cos pobres, tanto que ten problemas nas súas aparicións públicas. Chega a subir os presos do gran durante unha fame. Acusa a Gregorio I, logo de morto, de simonía.

novembro, 11: o ‘mordomo’ de Neustria Landerico vence as tropas do ‘mordomo’ de Burgundia Bertoaldo en Aurelianum (Orleáns). Austrasia, baixo Theuderico II mantense á marxe do conflito, o que constitúe a primeira disensión con seu irmán Teodeberto II.

Theuderico II asina unha paz con Clotario II en Compiegne.

decembro, 24: na batalla de Stampae (cerca de París) o exército de Theuderico II, coa axuda de Bertoaldo, vence ao de Neustria baixo Clotario II e logra entrar en París.

decembro, 25: Brunequilda argalla a morte do mordomo Bertoaldo para o que convence a Theuderico de que o mande a inspeccionar as villae reais ao longo do Sena. Logo fai que tamén arresten e maten ao encargado de matar o mordomo.

603

triente de ouro de Witerico
ceca ELIBERRI
www.maravedis.net

marzo: o embaixador bizantino Lilius, enviado onde Cosroes II, chega a Dara, onde lle comunican que será declarada a guerra contra Phocas.

Phocas ordena a Germanus, gobernador de Dara, que tome Edessa, onde Narsés se ten rebelado contra el, e este pide axuda a Cosroes II.

primavera: Liuva II enfróntase no propio pazo real de Toletum a unha rebelión ariana encabezada novamente por Witerico, que conta co apoio de gran parte da aristocracia. Nun combate o rei perde a man dereita, é capturado e executado polos rebeldes. Witerico, novo rei, fíxase como obxectivos expulsar os bizantinos e restaurar o arianismo.

xullo/agosto: Axilulfo sae de Mediolanum e asedia, coa axuda de auxiliares avaros, Cremona.

batalla de Degsastan: Aethelfrith, rei de Bernicia, vence as forzas combinadas de Strathclyde baixo Áedán mac Gabráin de Dalriada, establecendo a supremacía definitiva dos anglos na parte norte de Britannia.

Bonifacio (futuro bispo de Roma), nomeado apocrisiarius por Gregorio I.

a dinastía Sui mina o poder do turco Tardu instigando disensións entre turcos occidentais e orientais. Tardu, khagan occidental, é asasinado e sucedido por Heshana Khan, fillo seu, que impón fortes tributos ao pobo tiele.

abril, 7: Axilulfo, influído por Teodelinda, abandona o arianismo polo catolicismo e é bautizado, xunto co seu fillo Adaloaldo, na catedral de Monza, onde se instala a ‘coroa de ferro dos lombardos’.

a nova estabilidade en China baixo Wendi fai aumentar as zonas de cultivo e tamén progresa a tecnoloxía naval.

decembro: Shōtoku impón un novo sistema xerárquico na administración en Xapón que lle permite manexa con habilidade os clans máis poderosos e inserilos nun código de honor e obediencia ao poder central.

o monxe de Hibernia Offo funda a abadía de Schuttern en Alemaña.

agosto, 21: Cremona tomada polos lombardos. Axilulfo tamén toma Padua e Mantua, sendo repartidos os territorios destas cidades entre os ducados de Brescia e Bergamo.

setembro, 13: Mantua tomada polos lombardos; a fortaleza de Vulturnia réndese sen combate.

setembro: alcánzase unha tregua entre o exarca de Ravenna e os lombardos.

Gostun, soberano búlgaro.

agosto, problemas entre Comentiolus (magister militum Spaniae) e representantes eclesiásticos hispanos (Ianuarius, bispo de Malaga, un crego dependente deste e Stephanos, bispo de Illiberris), depostos e exiliados, causan o envío do defensor Xoan desde Roma. Había unha petitio por parte de Ianuarius, seguindo os procedementos do Corpus Iuris Civilis: Spania forma parte do exarcado de Africa, Mauretania II, e por tanto aplícanse as leis imperiais.

a causa do problema poden ser disensións dos bispos fronte á política imperial, unha posible conivencia co poder visigodo nas zonas limítrofes ou a morte de Liciniano, bispo de Carthago-Nova en Constantinopla, envelenado ab aemulis, segundo Isidoro de Sevilla.

Gregorio I escribe ao seu defensor Xoán, camiño de Hispania, para que poña orde nas condutas duns monxes da illa Cabreira, ao igual que sucede en Cerdeña: “alí onde a gravidade da culpa pide a aplicación da lei canónica, non podemos apartar a un lado o que é necesario corrixir, non sexa que, facendo ollos cegos, demos forza ás accións depravadas que, así como as encontramos, debemos de segar coa disciplina. Pois téñennos chegado novas de que os monxes do mosteiro na illa Cabrera, a carón de Mallorca, tamén unha illa (Capria insula, quae iuxta Maioricam idem insulam est ...),  obran de xeito tan perverso e teñen sometido as súas vidas a diversos crimes, que manifestan que, máis que servir a Deus, loitan, e dígoo chorando, a favor do antigo inimigo. Ti, coa autoridade que che confiren estas cartas, diríxete ao mosteiro, para informarte da vida e costumes dos que alí viven, procedendo a unha ampla investigación. Deste xeito, todo o que atopes que debe ser eliminado, tal como pide a norma canónica, terás que corrixilo impoñendo as penas correspondentes, e terás que preocuparte de informar os monxes de todo o que teñen que respectar. A túa forma de corrixir ten que servir para facer retornar os monxes ao camiño da boa vida monacal, de tal xeito que ti non sexas culpable de nada ante nós”

os datos arqueolóxicos falan dun complexo central común e unha serie de celas individuais arredor (o que permite cultos comúns e unha dedicación espiritual individual), unha zona de produción e unha necrópole, masculina e sen xoias, entre os ss. V-VII. Tamén hai restos en Conejera.

cando menos hai unha factoría de salgado de peixe e un taller de fabricación de púrpura. A comunidade debe ser bastante grande e probablemente non funcionará máis alá de 750 debido á inestabilidade política da época, con gran número de bandas de piratas.

Agostiño de Canterbury consegue que Aethelbert de Kent se bautice, o cal tamén lle permite entrar en Essex e Anglia oriental, territorios nos que o rei de Kent ten gran influencia.

Phocas trata de conter os avaros co pago dun forte tributo, o que lle vale o desprezo do exército. Ante o avance persa trata de obter apoios en occidente, recoñecendo a supremacía de Roma sobre Constantinopla, o que causa escándalo nesta cidade. Adopta medidas severas contra o monofisismo, que lle valen reaccións contrarias en Exipto e Asia Menor.

a pesar dos problemas e da gran diminución da poboación, as grandes avenidas de Roma seguen abertas. Moitos edificios públicos monumentais son dedicados a novos usos: cemiterios, vertedoiros, …

as importacións de produtos (envasados en ánforas) de Africa e o leste, inda que diminúen, seguen a chegar á capital.

neste ano prodúcese a última mención do Senado (aclamando as estatuas de Phocas e a súa dona Leontia) como tal pero a administración pública civil segue a funcionar, dirixida polo exarca de Ravenna. De todas maneiras, o gran poder romano é xa o bispo de Roma.

598

antiga división territorial
da península de Korea
www.wingsunfurled-web.com

Brunequilda fai asasinar a Wintrio, duque de Champaña, o que provoca a rebelión dos nobres, que a obrigan a refuxiarse en Burgundia.

marzo, 30: os avaros rompen o asedio de Tomis. Comentiolus dirixe un exército a través dos Balcáns e segue polo Danubio ata Zikidiba.

os avaros derrotan as forzas de Comentiolus, ao sur do monte Haemus, e capturan Drizipera (Thracia); gran parte das súas tropas morre debido á praga que provoca a súa propia devastación nos Balcáns.

Mauricio paga tributo aos avaros e conclúe un tratado con Bayan I, permitindo expedicións bizantinas a Wallachia. Reorganiza o exército e fortalece os ‚muros longos‘, ao oeste de Constantinopla.

os britanos derrotan a Bernicia cerca de Catterick.

batalla de Catraeth: os britanos de Hen Ogledd (‚o vello norte‘) baixo Mynyddog Mwynfawr derrotan os anglos de Bernicia e Deira no N de Britannia.

agosto, 4: Wendi ordena que o seu fillo máis novo, Yang Liang (axudado de Gao Joing, un ministro importante) conquiste Goguryeo durante a época de chuvias cun exército de 300000 homes.

a flota chinesa planta batalla á de Goguryeo (50000 homes) baixo o almirante Giang Ti-sik, sendo destruída no mar Bohai. Durante a invasión os chineses son derrotados e Yang Liang debe retirarse. Os chineses perden case un 90% do exército e da flota.

Yeongyang envía unha embaixada a Daxing, Wendi acepta un tratado de paz con Goguryeo.

outubro: Mauricio fai a paz con Axilulfo coa mediación de Gregorio I, que planea converter os lombardos. O imperio recoñece a perda do norte de Italia. O exarcado recupera algún territorio e asegúranse as comunicación entre Ravenna e Roma. Axilulfo aumenta o reino lombardo ocupando Sutri e Perugia.

597

Fredegunda de Neustria
globedia.com

Fredegunda derrota a súa rival Brunequilda, que apoia a Teodeberto II e Theuderico II contra Clotario II.

morre Fredegunda ‘inimica Dei atque hominum’, en Lutecia e soterrada na igrexa a Vicente, pero Clotario II (13 anos) segue a guerra e apóiase en Landy, ‘mordomo de palacio’, que pasa de ser un simple administrador da corte a unha especie de primeiro ministro.

Mauricio enferma de gravidade e escribe as súas ‘últimas vontades’, nas que describe as súas ideas de goberno. O fillo maior, Teodosio gobernaría o este desde Constantinopla e o segundo, Tiberio, o oeste, desde Roma. Os outros dous fillos varóns serían asociados ao poder. O emperador recupérase e estas vontades nunca entran en vigor.

outono: campaña dos Balcáns onde os avaros, reforzados polo tributo dos francos, retoman a campaña ao longo do Danubio e asedian Tomis, na costa do mar Negro.

Ceolwulf sucede a seu irmán Ceol como rei de Wessex, e faise rexente do seu sobriño Cynegils, quen é demasiado noto para herdar o trono.

Mangalesa, rei da dinastía Chalukya despois da morte de Kirtivarman I, goberna como rexente do seu fillo Pulakesi II e invade o territorio de Khandesh e Gujarat (NO de India).

xuño, 9: Columba morre en Iona (Hébridas) e é soterrado pola súa comunidade na abadía que creou.

Aethelbert publica o primeiro código legal da era post-imperial en Britannia; preocúpalle conservar a orde social imperante, por medio de compensacións e castigos contra danos persoais.

Agostiño funda a ‘escola do rei’ en Canterbury, en dependencias anexas á abadía.

Osma, sede episcopal.

Wendi introduce un novo calendario.

decembro, 25: Agostiño e os seus colaboradores bautizan a máis de 10000 anglo-saxóns.

596

illa de Thanet
www.littlestourbooks.com

marzo: Teodeberto II, rei de Austrasia, e Theuderico II, rei de Borgoña, baixo a rexencia de Brunequilda.

Fredegunda e Clotario II ocupan Lutecia (París).

xullo a decembro: Fredegunda insta a Clotario II a declarar a guerra a Teodeberto II e Theuderico II, que son derrotados en Latofao (Laffaux, entre Soissons e Laon); pero a guerra continúa a pesar diso.

Brunequilda evita un ataque avaro a Turinxia mediante un tributo.

Kyriakos, patriarca de Constantinopla.

Mauricio usa Marcianopolis como base militar para operar no baixo Danubio contra eslavos e avaros.

batalla de Raith: anglos toman terra cerca de Raith, costa do Fife, e derrotan unha alianza de escotos, britanos e pictos baixo Áedán mac Gabráin de Dál Riata.

Wendi establece relacións diplomáticas con Goguryeo e demanda a cancelación da alianza militar co khanato turco oriental.

Agostiño de Canterbury chega á illa de Thanet e é saudado por Aethelberht de Kent, quen acepta o bautismo co resto da súa corte por petición de Bertha, súa dona franca. O rei proporciónalles unha residencia en Canterbury, onde fundan un mosteiro beneditino.

595

'non angli, sed angeli'
commons.wikipedia.org

xaneiro, 1: Gregorio I reprocha ao patriarca de Constantinopla que se proclamara ‘patriarca ecuménico’.

febreiro, 28: asemblea de Colonia, onde Childeberto II ordena que as decisións tomadas nas asembleas de marzo precedentes sexan transcritas; publica un edicto que modifica a lei sálica.

primavera: terceira campaña de Priscus, quen dirixe unha forza de refresco que segue o Danubio ata Novae para socorrer Singidunum, asediada e saqueada polos avaros e abandonada cando se acercan as forzas imperiais.

primavera: Wendi ordena confiscar as armas en posesión de particulares, que deben ser destruídas; a única excepción afecta as provincias de fronteira.

verán: os avaros atacan a Dalmacia.

(suposta) anécdota ‘laudatoria’ sobre Gregorio I: pasa diante dun posto de venda de escravos e ve un grupo de mozos fermosos e de longos cabelos louros; pregunta de onde son, ‘anglos’ e replica ‘non angli, sed angeli’. De aquí partiría o seu interese por ‘evanxelizar’ a ‘angla terra’ (Britannia pasa a ter unha denominación alternativa), misión que encomenda a Agostiño de Canterbury.

xuño: Agostiño de Canterbury sae de Roma acompañado de monxes beneditinos a Britannia, a ‘cristianizar’ a Aethelberht e Kent. Leva cartas para os bispos e acompáñanos intérpretes francos.

agosto, 12: Gregorio I dirixe a carta ‘o quam bona’ sobre a simonía ao bispo Virxilio de Arelate.

Childeberto II guerrea contra os varnos, que se rebelan en Turinxia e son practicamente aniquilados (non volven aparecer nas fontes escritas).

setembro, 2: morre Xoan IV, patriarca de Constantinopla, logo de mediar sen éxito cos monofisitas.

Muhamad casa con Khadija.

outubro: Childeberto II morre; súa nai Brunequilda tenta asumir o poder como rexente dos seus netos, Teodeberto II e Theuderico II.

os lombardos saquean Terracina, importante punto de apoio militar bizantino.

Gaidoaldo, duque de Trento.

Bernicia conquista o reino britano de Hen Ogledd (‘o vello norte’), nos Penines. O rei Dynod Bwr morre na loita e a súa familia foxe a Powys.

Supratisthita Varman sucede a seu pai Susthita Varman como rei da dinastía Varman en Assam (NE de India).

iníciase a construción da ponte Zhaouzhou (‘ponte de paso seguro’) na provincia Hebei durante a dinastía Sui.

K’inich Hix Chapat, soberano da cidade maia Toniná.

Heraclio acompaña a seu pai (Heracilo o vello) ou visítao cando este é magister militum per Armeniam. O que ve e aprende serviralle no futuro; perfecciona a súa educación literaria: probablemente é bilingüe (grego e armenio).

carta de Liciniano de Cartaxena a Vicente de Ibiza, proba do mantemento do bispado da illa; este feito e o elevado número de edificios relixiosos en Mallorca e Menorca probaría que tamén permanecían bispos alí durante a presenza bizantina.

a carta de Liciniano responde a unha previa de Vicente non conservada; Vicente informáralle da que lle chegara una ‘carta caída do ceo’, escrita por Cristo, que lera no púlpito, e na que se exhortaba a gardar o domingo, do mesmo xeito que os xudeus gardan o sábado; isto é, sen realizar ningún tipo de traballo, nin viaxe, …

Liciniano non concorda con Vicente e amoéstao por ter dado crédito a tal cousa, indicando cal debe ser o comportamento dos fieis en domingo: traballar como de costume e non dedicarse a “bailar, danzar e retorcer de mala maneira os membros que Deus formou harmoniosos e cantar cancións lixeiras que excitan a lascivia”.

da carta podemos deducimos: 1/ os bispos de Baleares están vinculados á sé metropolitana de Cartaxena durante a soberanía bizantina (carácter amoestador de Liciniano); 2/ a credulidade de Vicente testemuña a escasa formación doutrinal e teolóxica do clero das illas; Liciniano queixarase posteriormente a Gregorio I de que lle era imposible atopar xente apta para o sacerdocio, só atopaba bígamos e xente que non sabía máis que o ‘painoso’; 3/ o carácter xudaizante da carta ‘caída do ceo’, procedente de Ibiza, vólvenos a falar da xudería balear, que estaría en boa convivencia coa comunidade cristián, situación que mudará no s. VII en conxunción coa ameaza islámica, de que se lles ve como colaboradores.

594

gran muralla chinesa
www.disfrutapekin.com

Evagrios Scholastikos, na súa crónica, gábase de que no imperio, desde tempos de Constantino I, ningún usurpador ten subido ao trono.

marzo: Axilulfo levanta o asedio de Roma logo de que Gregorio I acorde pagar un tributo de 500 libras.

os eslavos invaden Moesia e Macedonia e destrúen as cidades de Aquis, Scupi e Zalpada en Dobruja.

outono: Mauricio releva a Priscus por terlle desobedecido e nomea a seu irmán Pedro, sen experiencia militar, como comandante dos exércitos nos Balcáns.

Wendi repara e amplía unha sección da ‘gran muralla’ no NO por medio de traballadores forzados, que morren a miles durante as obras.

por indicación do rexente Shotoku Taishi a emperatriz Suiko publica o ‘edito dos tres tesouros floridos’, recoñecendo oficialmente o budismo en Xapón. Inicia contactos diplomáticos coa dinastía Sui en China.

Amos sucede a Xoán IV como patriarca ortodoxo de Xerusalem.

Xisulfo II sucede a Arichis coma duque de Friuli.

os samaritanos rebélanse contra o goberno imperial.

Muhammad dirixe a Syria unha caravana en representación de Khadija, unha rica comerciante de a Meca.

592

 Grégoire de Tours, Historia Francorumfol. 79v. Initiale ornée "A"
biblioteca nacional de Francia
latín 17655.
commons.wikipedia.org

marzo, 28: Gontran (59 anos) morre e sucédelle Childeberto II en cumprimento do pacto de Andelot. Gontran é soterrado na igrexa de Marcelo en Chalon-sur-Saone.

Ariulfo, que estivera ao servizo dos bizantinos na fronte persa, é o novo duque de Spoleto.

os bávaros atacan rexión controladas por eslavos na actual Austria.

marzo – abril: Mauricio marcha contra os avaros asentados en Anchialus á cabeza do exército bizantino (o día da súa partida hai un eclipse de sol). Tamén recupera Singidunum (Belgrado). As tropas bizantinas ‘obteñen’ ingresos extra ao saquear terras e posesións dos avaros.

Mauricio, de volta en Constantinopla, recibe embaixadas de Persia, os francos e os avaros.

xuño, 29: Ariulfo asedia Roma e corta as comunicacións con Ravenna. Mentres, Arixis de Benevento ameaza Neapolis. Gregorio I considera que o exarca non fai o necesario para protexer Roma e inicia conversas co rei Axilulfo.

Ceawlin, logo da derrota ante os britanos é deposto como rei de Wessex e o seu fillo Cuthwine é feito prisioneiro e condenado ao exilio. Ceol sucede a seu tío.

verán: o emperador Wendi reduce os impostos debido ao ‘exceso’ das existencias de alimento e seda nos almacéns do estado. Envía mensaxeiros a China central para redistribuír a terra e que os pobres obteñan o que precisan para subsistir.

novembro, 13: Sushun é asasinando en Xapón polos axentes do seu rival Umako Soga, que recea do poder do emperador. Sucédelle Suiko, viúva do anterior emperador Bidatsu.

Suiko traslada a capital xaponesa a Asuka-Toyura (prefectura Nara) inaugurando o período Asuka.

outono: Priscus recibe o mando das tropas en Thracia; súmanse unidades que estaban destinadas na fronte persa.

Gregorio I asina un tratado de paz cos lombardos en contra dos plans de Mauricio.

Gregorio de Tours finaliza a súa historia francorum.

589

Recaredo no iii concilio de Toledo
historiageneral.com

Xoán, bispo de Dumio.

terceira rebelión contra Recaredo apoiada polo bispo Uldilda e Golsvinta, viúva de Leovixildo; tamén sufocada. Argimundus, un dos rebeldes é desterrado en Callaecia.

febreiro, 10: o xeneral Heruo Bi conquista Jiankang, sede da dinastía Chen, facendo de Sui Wendi emperador de toda China. Continúa coa campaña de obras públicas para facilitar as comunicacións entre norte e sur: vías fluviais e estradas imperiais para as que os traballadores eran recrutados á forza entre a poboación.

marzo, 1: as monxas da Santa Cruz de Poitiers rebélanse contra a abadesa Leubovera, e chegan a Tours levadas pola princesa Chrodielda e súa curmá Basina. Chrodielda provoca unha entrevista con Gontran durante o verán, quen lles ordena reunirse para examinar o conflito.

abril, 10: Mauricio renuncia a reducir as soldadas e iso frea as revoltas das tropas na fronte persa. Philippicus é aceptado como comandante.

primavera: Bahram Subin conquista Martyropolis grazas á traizón de Sittas.

maio, 8: III concilio de Toletum presidido por Leandro, onde Recaredo se bautiza católico e abxura publicamente do arianismo xunto con outros nobres e altos xerarcas da igrexa. Anuncia a devolución de bens confiscados durante o período ariano. O concilio decreta que os fillos dun matrimonio mixto (cristián – xudeu) serán bautizados á forza.

os anteriores concilios de Toledo tiveran menos relevancia pero a partir de agora serán asembleas fundamentais para tomar decisións políticas e relixiosas; participarán tanto bispos como nobres, que se retiran unha vez tratados os asuntos civís.

maio, 15: en Verona Authario casa con Teodelinda, filla do duque bávaro Garibaldo I e Walderada, quen en realidade estaba namorada de Childeberto II. Sen embargo, tivera que fuxir de Gallia cara Italia en compaña de seu irmán Gundobaldo. Teodelinda é católica e vai influíndo na corte lombarda.

a igrexa católica é unha potencia económica e política. Moitos propietarios doaran os seus bens para evitar que caeran en mans da aristocracia franca ou goda e a igrexa acaba sendo propietaria de terras, gando, casas, …

a administración dos bens eclesiásticos funciona a base de parroquias, dependentes dos bispos. O traballo realízano escravos e unha parroquia con menos de dez é consideraba pobre. En occidente a renda dunha parroquia divídese en catro partes: unha para o bispo, outra para os cregos, outra para a conservación dos bens e a cuarta para os pobres; nalgunhas, esta última considérase superflua e suprímese.

primavera: expedición de Authario cara Samnium e en Calabria, ata Reggio. Os lombardos fan de Benevento a capital dun poderoso ducado.

xuño: Xoán IV, patriarca de Constantinopla, proclámase ecuménico nun sínodo. Pelaxio II protesta e prohibe que Gregorio, apocrisiarius, se comunique con el.

verán: Philippicus asedia Martyropolis, pero é rexeitado cando chegan reforzos persas.

Mauricio planifica a invasión de Azerbaijan polas tribos do Cáucaso, baixo a dirección de Guaram I de Iberia.

Fredegunda fracasa na tentativa de asasinar a Rigunthis, filla de Chilperico I.

Childeberto II tenta impor impostos aos cidadáns de Tours e o bispo Gregorio logra que desista facendo alusión á inmunidade outorgada por Fredegunda.

outubro, 17: o río que pasa por Verona sáese da súa canle, inunda a igrexa de Zenón e deteriora as murallas.

Smaragdo enferma dalgún tipo de demencia e substitúeo Romanus en Ravenna. A súa chegada inicia unha contraofensiva imperial contra os lombardos. Nordulf, xeneral lombardo a soldo do imperio, regresa a Italia e ponse ás ordes do exarca. Concértase un plan conxunto cos francos para vencer a resistencia lombarda.

tres columnas francas entran en Italia e avanzan cara o sur tomando e destruíndo moitas fortalezas e Romanus escribe a Childeberto en agradecemento por colaborar na ‘liberación’ de Italia.

Romanus lanza o seu propio ataque no val do Po e captura Módena, Altinum e Mantua; Parma, Rhegium e Placentia son entregadas polos seus propios duques lombardos e Xisulfo, fillo de Grasulfo de Friuli, un ‘home ansioso por mostrarse mellor do que fora seu pai’ (Romanus), pásase ao imperio cos seus homes. Algunhas cidades fronteirizas son tomadas por Nordulf e Osso, outro xeneral.

sen embargo, os francos e as forzas imperiais non fan fronte común e os francos non poden presentar batalla aos lombardos porque estes se retiran a lugares seguros e ben fortificados. Authario mesmo permanece en Ticinum. Pasan tres meses e a disentería comeza a causar estragos entre os francos; o seu comandante, o duque Chedin, acampado cerca de Verona acorda con Authario una retirada durante dez meses e marcha de Italia.

Childeberto II e Germanus cúlpanse mutuamente da situación; o exarca quéixase da pouca paciencia de Chedin, que podía ter derrotado a Authario usando as súas armas de asedio: “se tiveran tido un pouco de paciencia, hoxe Italia estaría libre desa odiosa raza e todas as riquezas do innomeable Authario terían ido para á túa tesouraría; xa que a campaña acadara tal punto que os lombardos xa non se consideraban a salvo dos francos, incluso dentro dos muros das súas cidades.” Urxe a que Childeberto envíe outro exército cun xeral que sexa de máis confianza. Suxestiona atacar na época de colleita para destruír os alimentos dos lombardos e concertar as rutas cos exércitos imperiais evitando prexudicar os romanos.

Childeberto, sen embargo, conclúe un tratado con Authario.

Pelaxio II pode dedicarse a cuestións eclesiásticas: trata de resolver o cisma de Aquileia pero fracasa.

novembro, 1: no concilio de Narbona, cidade onde conviven godos, romanos, xudeus, gregos e sirios, prohíbese aos xudeus cantar salmos nos seus funerais.

novembro: o Tíber causa importantes inundacións en Roma e morren moitas persoas, caen moitas vivendas e monumentos, e o subministro de alimentos vese interrompido. Pouco despois comezan a aparecer casos de peste, que matan a inda máis xente.

Gontran ordena atacar Septimania: o duque Austrovaldo logra tomar Carcassona. O duque Boson chega coas súas tropas de Saintes, Périgueux, Burdigalia, Agen, e Tolosa substitúeo como comandante; pero déixase sorprender e é vencido definitivamente polos godos, comandados por Claudius, dux de Lusitania. Os francos deixan atrás 5000 mortos e 2000 prisioneiros.

morre o pai de Máximo Confesor (Moschion), un ano máis tarde súa nai, escrava persa. El ingresa coma monxe no mosteiro de Palaia Lavra (san Chariton), acollido polo abade Pantaleón. Máximo chama a atención de Sophronius (no mosteiro próximo de Teodosio) e ambos establecen unha longa relación na que o talentoso mozo influencia o home maduro.

as novas sobre Máximo están nunha biografía contemporánea aos feitos escrita por un tal Xurxo de Reshaina, que participa en círculos monotelistas, o que explica a acusación feita a Sophronius de “orixenista” e o ton agresivo da Vida de Máximo composta en Syria xa que el loitaría toda a súa vida contra esta herexía; o cal lle acabará custando a vida.

Heraclio o Vello derrota un exército persa na proximidade de Nisibis.

os persas capturan as cidades de Balk e Herat, no leste. Cruzan o Oxus e rexeitan unha invasión turca.

Yan Zhitui, funcionario e erudito, fai a primeira referencia ao uso de papel hixiénico na corte imperial Chen por cidadáns de clase alta.

588

Guaram I de Iberia

unha revolta ariana en Emerita urdida polo bispo Sunna e os condes Segga e Witerico é sufocada con certa rapidez; Segga sofre a amputación das dúas mans e o desterro a Callaecia.

un exército persa (12000 homes) baixo Bahram Subin, apoiado por catafractos, embosca os turcos e logra unha gran vitoria na batalla da Rocha Hyrcaniana.

abril, 18: a redución dun cuarto nas soldadas causa motíns nas tropas bizantinas do fronte persa. Moitos deciden cobrarse pola súa conta asaltando e roubando propiedades alleas. A situación non pode ser aproveitada polos exércitos persas, que deben conter as incursións bárbaras no Cáucaso.

maio–xuño: Priscus, que relevara a Philippicus, regresa a Constantinopla e Philippicus volve a ser nomeado magister militum per Orientem. Continúan os motíns e os soldados elixen a Germanus como comandante.

verán: Germanus defende Constantina do ataque persa.

verán: Guaram I de Iberia, príncipe xeorxiano no exilio, é enviado por Mauricio a Mtskheta (Xeorxia), onde restaura a monarquía e recibe o título bizantino de curopalates.

verán: primeira campaña dos bizantinos nos Balcáns baixo Priscus, que fracasa, motivando os avaros a penetrar ata Herakleia, no Mármara.

outono: batalla de Martyropolis, onde os bizantinos baixo Germanus derrotan os persas, que iniciaran unha ofensiva.

outono: os avaros retíranse a Sirmium ante as novas do avance turco e logo de recibir pagos de Constantinopla.

Aella de Deira morre e é sucedido polo seu fillo Aethelric.

Childeberto II volve invadir Italia e ataca os lombardos, quen, dirixidos por Authario, derrotan a invasión contundentemente.

peste en Gallia: cóbrase a vida de por exemplo o bispo Licerius de Arelate.

Wen Di, emperador Sui, segue con preparativos contra a dinastía Chen situando 518000 homes ao longo da ribeira norte do Yangtze, desde Sichuan ata o Pacífico.

587

espanaeterna.blogspot.com

xaneiro, 13: Recaredo, xunto con parte da aristocracia e algúns bispos godos, convértese ao catolicismo en consonancia coa maioría da poboación e xerarquía eclesiástica. Isto ocasiona descontento no resto da aristocracia, ariana, que non tarda en rebelarse no NE, dirixida polo bispo Athaloco e os condes Granista e Vildixerno, apoiados por Gontran, católico, pero que ve factible sacar partido e pon a escusa  de vingar a Hermenexildo. A revolta é sufocada sen dificultade no ano.

Mauricio constrúe máis fortificacións na ribeira do Danubio para conter avaros e eslavos.

Comentiolus, magister militum, reúne un exército de 10000 homes en Anchialus (Bulgaria) para atacar os avaros nos montes Haemus. Os avaros invaden Thracia e logo dun primeiro éxito contra Castus, son derrotados polos xenerais bizantinos Droctulf e Xoán Mystacon nas proximidades de Adrianopolis.

os vascóns atravesan os Pirineos e arrasan a Novempopulania; o duque de Tolosa Austrovaldo tenta contelos.

Aegidius de Reims, acusado de crimes de lesa maxestade, implora perdón a Childeberto II, ofrecéndolle grandes presentes.

o comes Syagrius é enviado por Gontran onde Mauricio, quen o nomea patricius.

abril, 15: batalla de Shigisan, na que o clan Soga, en alianza matrimonial co clan real Yamato, imponse definitivamente ao Mononobe e o Nakatomi e impón o seu sucesor para o trono logo da morte de Yomei. Será Sushun (66 anos), fillo de Kimmei, 32º emperador e budista.

Wen Di, emperador Sui acaba coa dinastía Liang occidental e expande a súa influencia ao conca baixa do río Yangtze. Encarga a Gao Jiong a pacificación dos territorios e o antigo emperador Xiao Jing Di é nomeado duque de Liang.

Bagha Qaghan, 7º khagan turco.

Sunna, poderoso bispo ariano de Emerita, tamén conspira contra Recaredo.

a cuestión do ‘filioque’ é usada por primeira vez no credo niceno contra os arianos en Hispania.

primavera: os bretóns atacan Nantes.

Gontran envía unha embaixada a Armorica para que cesen os ataque bretóns e esixe obediencia a Waroch II, demandando 1000 solidi en compensación polo ataque a Nantes.

agosto, 4: Fredegunda envía asasinos contra Gontran, pero sen éxito.

inverno: Childeberto II depón a Leudefredus I como duque alamano e impón a Uncelenus como sucesor seu.

novembro, 28: Gontran asina con Childeberto II o tratado de Andelot, polo que o nomea herdeiro seu; en realidade establécese que o que sobreviva herdará os territorios do outro xa que non se pode predicir quen morrerá antes, a pesar das súas idades. Os dous alíanse contra os grandes nobres e o seu poder crecente. O pacto é promovido por Brunequilda e Gregorio de Tours. Childeberto recupera Borgoña e Aurelianum.

Gennadius, futuro exarca, sufoca unha rebelión bereber en Africa.  

os cregos occidentais que visitan Constantinopla hospédanse na domus Placidiae.

Sledda, rei de Essex coma sucesor de Aescwine, seu pai.

a peste chega a Marsella nun navío procedente de Hispania e arrasa a cidade.

os bizantinos establecen contactos cos ‘antos’ para que estes ataquen os eslavos polo norte.