584

Authario, rei lombardo
crónica de Nuremberg, 1493
en.wikipedia.org

Eborico é deposto e confinado nun mosteiro por Andeca, que casara con súa nai, e é novo rei dos suevos en Callaecia.

Leovixildo toma finalmente Hispalis e Hermenexildo refúxiase en Corduba, pero seu pai tamén a toma; negocia o perdón desde unha igrexa e é desterrado a Tarraco. Leandro tamén é desterrado. Ingunda foxe cun fillo varón de ambos a Africa.

Gontran restitúe os territorios en torno a Marsella ao seu sobriño Childeberto II e renova con el unha alianza. Chilperico, que teme un ataque combinado, refúxiase en Cambrai co seu tesouro e fai que reparen os muros da cidade.

Chilperico I ten un fillo varón, Clotario, a quen “fixo educar no seu dominio de Vitry-en-Artois a fin de que non lle acontecera ningunha desgraza se se lle vía en público e puidera morrer” (Gregorio de Tours); nestas poucas palabras temos como se desenvolve a vida privada na época: ao rei acáballe de acontecer algo de suma importancia, un fillo varón, nada sobre a nai, cuxo nome é dubidoso, tal vez unha concubina, e tan pronto como nace envíao onde unha nodriza da cidade (Cambrai) ao campo. Hai que ocultar a infancia e vivir en privado para evitar as ameazas do mundo exterior. A vida privada é amor, violencia, anguria e morte.

Childeberto II parte a Italia, financiado polos bizantinos, para atacar os lombardos. Os duques lombardos sométense e tamén lle pagan un tributo e Childeberto retírase. Mentres, Chilperico aproveita para recuperar París.

segunda embaixada do senador Elpidius onde Bayan; conclúen un tratado de paz.

primavera/verán: embaixada bizantina en Persia. O xeneral Xoán Mystacon é substituído por Philippicus, cuñado do emperador, nomeado magister militum per Orientem, quen recruta tropas e fortifica Monocarton.

verán: os avaros son vencidos por Comentiolus logo de que estes penetren ata os ‘muros longos’ de Thracia.

Creoda funda o reino de Mercia.

incendio de Bourges.

Muhammad (14 anos) participa cos seus tíos nos combates que enfrontan o seu clan co beduíno Hawazin.

final de setembro/ inicios de outubro: o único fillo vivo de Chilperico (Gregorio de Tours: ‘Nerón e Herodes do noso tempo’) é Clotario e el mesmo tamén morre ao regresar dunha cacería en circunstancias misteriosas cerca de Chelles, quizás por instigación de Brunequilda ou da propia Fredegunda.

setembro: Rigunthis, filla de Chilperico e Fredegunda, parte de París cun gran tesouro a Hispania para casar con Recaredo. Na primeira parada que fai a expedición desaparece parte da escolta con todo o que son capaces de roubar. En Tolosa, o duque Didier, logo de saber do asasinato do rei, faise co resto das riquezas. A princesa é devolta a súa nai.

Fredegunda faise co tesouro real de Neustria, foxe a París con Clotario (catro meses) e pide a protección de Gontran para os dous. Gontran chega a Paris cun exército para garantir o trono de Neustria a seu sobriño contra as ambicións de Childeberto II, tamén sobriño, que reclama en Meaux a súa parte de Neustria.

o recen nado pasa a ser Clotario II de Neustria, baixo a tutela de Fredegunda e Gontran pero notables como o bispo de Rouen expresan dúbidas sobre que Clotario sexa realmente fillo de Chilperico; Fredegunda fai matar este bispo e que outros xuren a lexitimidade do neno.

os britanos vencen a Ceawlin de Wessex en Fethanleigh, onde morre o irmán do rei, Cuthwine.

Berta, filla de Chilperico, casa con Ethelberto de Kent, pagán, pero que permite que ela conserve a súa fe e leve sacerdotes con ela a Britannia.

os duques lombardos séntense ameazados logo da invasión franca e elixen rei a Authario, fillo de Clef, un mozo xa ben experimentado no combate, que residirá en Ticinum.

Mauricio, coa axuda de Pelaxio II e o apoio pagado dos francos (50000 solidi), logra conter os lombardos e asegura o dominio dunha porción de territorio, o exarcado de Ravenna. A capital da fronteira é salvada coa axuda da flota imperial.

outubro, 4: Pelaxio II describe a situación en Roma a Gregorio, apocrisiarios en Constantinopla: “tan grandes son as calamidades e tribulacións que sufrimos pola perfidia dos lombardos a pesar das súas solemnes promesas que ninguén as podería describir ... O imperio atópase nunha situación tan crítica que, a non ser que Deus prevaleza no corazón do noso pío señor para que mostre aos seus súbditos a piedade que sinte e lle dea un comandante ou un xeral, estamos perdidos. Xa que o territorio que rodea Roma está completamente indefenso e o exarca escribe que non pode facer nada por nós, sendo el mesmo incapaz de defender a zona de Ravenna (...)”. A carta de Pelaxio contén a primeira mención ao exarcado, que supón na práctica recoñecer as conquistas lombardas. Un exarcado é unha provincia de fronteira militarizada, organizando o que queda de Italia nunha unidade defensiva.

Pelaxio pide que Gregorio interceda ante o emperador para salvar a situación contra os lombardos. Mauricio envía a Smaragdus con un exército e o título de exarca. Sen embargo, o título, que confire poderes teóricos ilimitados, depende na práctica dos recursos militares dispoñibles, e estes son insuficientes para diminuír o poder lombardo, pero si abondan para consolidar o exarcato.

outono: Philippicus devasta as chairas de Beth Arabaye, próximas a Nisibis.

os avaros ocupan (por pouco tempo) Singidinum e Viminatium e asedian Thesalónica.

Kubrat, primeiro khagan búlgaro mencionado polo seu nome nas fontes.

Yang Jiang prepara a conquista del sur, constrúe catro silos para asegurar o abastecemento da capital, Chang'an, establece as primeiras conexións por barco co sur e asina acordos cos turcos para garantir a paz no norte. Tamén constrúe un enorme canal navegable que desenvolve o comercio e o abastecemento de auga, pero tamén servirá para rápidos movementos de tropas.

decembro: Gondovaldo volve a Gallia e proclámase rei en Brives, pero o nacemento de Clotario réstalle novamente posibles adeptos. Retírase a Comminges.

583

reconstrución de Hispalis
www.sconarte.com

Miro morre e elixen rei ao seu fillo Eborico, quen se somete a Leovixildo, co que aparece un grupo de nobres descontentos que encabeza Andeca.

Leovixildo estreita o asedio a Hispalis e esixe a Hermenxildo que se presente en Toletum para renunciar ao catolicismo.

Mauricio decide deixar de pagar o tributo anual aos avaros.

Chilperico I instálase en París, desafiando o acordo logo da morte de Clotario I, e o bispo Ragnemodo bautiza ao seu fillo Teuderico ao día seguinte, domingo de Pascua.

concilio provincial en Lugdunum baixo o bispo Priscus que determina que os bispos deben atender os leprosos para controlar a enfermidade.

primavera – verán: Chilperico I ataca a Gontran no Berry, envía os duques Didier e Bladaste, que atopan as tropas de Gontran en Chateaumeillant, onde se producen moitas baixas por ambos bandos. Didier e Bladaste reciben o apoio de Berulfus, duque de Tours e Poitiers e asedian Bourges. Ao norte, Chilperico é sorprendido por Gontran en Melun e vese obrigado a asinar un acordo. O asedio de Bourges remata pero a zona é arrasada polas tropas que se retiran, tanto que Chilperico se ve obrigado a axustizar a un dos responsables, o conde de Rouen.

verán: os avaros seguen ocupando os Balcáns, agora ocupan Viminacium e Augusta en Illyricum e chegan tamén a Achialus, na costa do Mar Negro.

outono: Bayan I recibe en Anchialus unha embaixada bizantina presidida por Comentiolus e Elpidius.

o duque Grasulf de Friul contacta con Childeberto II e Brunequilda para emprender unha campaña en Italia cos subsidios de Bizancio.

bávaros e eslavos loitan en Aguntum, no curso superior do Drave.

novas persecucións contra os pagáns helenos por parte de Mauricio.

a fortaleza de Monemvasia, no Peloponeso, é construída polos gregos que foxen dos eslavos e avaros co apoio de Mauricio como protección contra estes.

Muhammad inicia viaxes a Syria formando parte de caravanas comerciais que encabeza seu tío Abu Talib.

os bereberes inician ataques á rexión exipcia de Wadi Natrun que se estenden ata o ano seguinte.

os kirguizes vólvense tributarios dos turcos.

a varíola esténdese desde China a Korea e Xapón.

Yohl Ik’nal sucede a Kan Balam I como raíña da cidade maia de Palenque.

582

sólidus de Mauricio
moneda-clasica.foroactivo.com

Hermenegildo rebélase abertamente contra seu pai co apoio, principalmente, da aristocracia e clero católico e os suevos. Leovixildo recruta un gran exército e toma Emerita (Mausona é arrestado e exiliado durante tres anos) e Badaxoz. Despois de asegurarse a neutralidade dos romanos planifica o ataque a Hispalis.

Leovixildo envía aos hispanorromanos Florentius e Exuperius como embaixadores aos reinos francos de Childeberto II e Chilperico I, con cuxa filla Rigunthis propoñen un casamento para Recaredo.

os godos asedian os exércitos suevos en Baetica, onde estes foran a apoiar a Hermenexildo e son obrigados a capitular e volver a Callaecia, onde Miro, o rei, chega enfermo.

Leovixildo asedia Hispalis e conquista prazas próximas: Osset e Italica.

agosto, 13: Tiberio II presente que morre, posiblemente envelenado, casa a Mauricio coa súa filla Constantina e noméao herdeiro.

agosto, 14: morre Tiberio (48 anos, posiblemente envelenado) e Mauricio é o novo emperador.

en tempos de Mauricio o officium ducis consta de: un consiliarius ou asessor en materia legal, un cancelarius, que dirixía a chancelería provincial, un chartularius, encargado dos rexistros, varios scholastici, ou xuristas, algúns scribones, oficiais destacados das ringleiras dos excubitori, para controlar a administración militar, e un maiordomus, que gobernaba a casa ducal. En 633 o dux Numidae Pedro conta tamén coa colaboración dun sacellarius, probablemente, membro do sacrum cubiculum, e, por tanto, ligado á xestión financeira dos dominios imperiais da provincia.

outono: Mauricio nomea a Xoán Mystacon magister militum per Orientem e envíao un exército a Arzanene (Armenia) onde loita onde o río Nymphius (río Batman) contra o xeneral persa Kardarigan, quen o derrota debido á traizón e defección do legado Cours.

os avaros baixo khagan Bayan I, xunto con auxiliares eslavos, ocupan Sirmium logo de tres anos de asedio. Establecen unha base de operacións no imperio desde a que lanzarán incursións de saqueo aos Balcáns.

Gontran Boson urde para que Gondovaldo, suposto fillo ilexítimo de Clotario I, chegue a Marsella con financiamento bizantino para reclamar parte da herdanza de seu pai, nomeadamente as cidades de Poitiers e Tolosa. Sen embargo, Chilperico I ten un fillo varón e Gondovaldo perde apoios e debe reembarcar e volver a Constantinopla. Gontran Boson fai deter ao bispo Teodoro de Marsella nun intento de desviar a atención sobre o seu papel na usurpación fallida.

conversión forzosa de xudeus nos dominios de Chilperico I.

un exército persa baixo Tamkhosrau cruza o Éufrates e ataca Constantina (Turquía), pero é derrotado e aniquilado, incluído o seu comandante.

primavera: Xuan Di (52 anos) morre e é sucedido polo seu fillo Houzhu, incompetente, novo emperador da dinastía Chen.

Wen Di, dinastía Sui, ordena a construción dunha nova capital, bautizada Daxing (gran prosperidade), nunha localización ao surleste de Chang’an (actual Xi’an).

Iohannes Nesteutes, patriarca de Constantinopla.

o imperio turco divídese definitivamente en dúas confederacións: oriental, que se extendía ao norte de China; e occidental, ata Sogdiana.

581

mosteiro de Montecassino, reconstrución
www.oneonta.edu

Leovixildo reprime unha sublevación dos vascóns e funda Victoriaco para celebralo.

Zotto de Benevento asedia Neapolis pero non a pode conquistar, destrúe Aquinum e captura Venafrum, cuxo clero fuxe cara Neapolis; ataca e saquea Montecassino e os monxes beneditinos que sobreviven foxen a Roma pero pasado o perigo volven ao lugar para reconstruír o mosteiro.

Taspar Qaghan asedia Chersonesos Taurica (Ucraína), no mar Negro, e a súa cabalería segue a saquear as estepas de Crimea (ata 590).

febreiro, 13: Yang Jian, emparentado por matrimonio coa dinastía Zhou, executa a Jing Di (8 anos) e 58 parentes máis en Chang’an, e funda así a dinastía Sui. Adopta o nome de Wen Di. En principio foi un golpe incruento pero tivo que enfrontarse inmediatamente a unha rebelión encabezada por Gao Jiong, e só despois de derrotalo puido consolidar a súa posición. O obxectivo é agora conquistar o sur e unificar China.

Hormizdas IV declara a guerra aos bizantinos. O seu xeneral Bahram Subin vencera os turcos un ano antes.

Mauricio derrota a Bahram Subin en Constantina. A raíz disto, Bahram Subin é humillantemente destituido.

Mauricio, apoiado polo ghassánida al-Mundhir III, non logra conquistar Ctesiphonte. Mauricio acusa de traizón a Mundhir, quen é enviado a Constantinopla para ser xulgado. Tiberio II trátao con respecto e permítelle a el e á súa familia vivir nunha residencia confortable.

al-Un’man IV, fillo de Mundhir, rebélase contra os bizantinos, pero estes acaban co reino como tal entidade.

morre Gogon e os novos conselleiros de Austrasia encabezados por Aegidius, bispo de Reims, e co acordo de Ursion, Berthefriedo e Gontran Boson rompen o tratado con Gontran e asinan unha nova alianza con Chilperico I, polo que Childeberto II (11 anos) é recoñecido como herdeiro seu. Loupo, duque de Champaña, fiel a Brunequilda, debe fuxir onde Gontran. A xente de Austrasia non concorda coa nova alianza.

Enius Mummolus rompe con Gontran e retírase a Avignon, baixo a protección de Childeberto.

Childeberto de Austrasia confía ao duque Gundulf a conquista da rexión de Marsella e reinstaurar ao bispo Teodoro, quen estaba en conflito co prefecto de Gontran Dynamius, que o fixo prisioneiro. Gundulf consegue o seu obxectivo pero cando marcha Dynamius consegue de novo que a cidade se revolva contra o control de Austrasia e a favor de Gontran.

o duque Didier entra en Aquitania por encargo de Chilperico, que aproveita a discordia entre Childeberto e Gontran para apoderarse de Agenais e Perigord, posesións de Gontran.

Chilperico envía ao duque Bladastes contra os vascóns ao sur dos Pirineos. Derrotado, deixa que as tropas sobreviventes se vaian libres.

Aella conquista Deira dos britanos e faise rei.

morre Arslan Tobo-Khan (Taspar) e o seu sucesor Shetu Baga Ishbara enfróntase cos turcos occidentais baixo Qara-Chrui Turk Bogiu, o que supón a fin do primeiro reino turco unificado.

comeza o interregno no imperio turco ao haber varios candidatos ao trono: Talopien (o candidato do khagan morto), Ishbara (o candidato de Kurultay) e Tardu (yabgu occidental). Ishbara logra imporse.

Mauricio escribe o strategikon, un tratado de arte militar.

580

Hermenexildo
www.primeroscristianos.com

Hermenexildo proclámase rei en Hispalis, acuña moeda co seu nome, inda que recoñece a dignidade real de seu pai. Os godos de Baetica e Lusitania acatan a súa autoridade. Nestas zonas é probable que os arianos sexan despoxados das súas igrexas e perseguidos nas provincias sublevadas.

Leovixildo trata de contrarrestar o catolicismo cun sínodo en Toletum que dita medidas para facilitar as conversións ao arianismo: decrétase que os católicos que cambien de credo non necesitan volverse a bautizar, o que semella lograr bastantes conversións entre a poboación católica.

debate ideolóxico en Mausona (católico) e Sunna (ariano) en Emerita.

Miro apoia a Hermenexildo e envía unha embaixada a Gontran e outra a Constantinopla.

o godo ariano Axila dialoga con Gregorio de Tours: ‘inda que nós non creamos o mesmo ca ti, non falamos mal, porque ter unha opinión ou outra non debe ser considerado un crime’.

Fronimius, bispo de Agde, alertado de que Leovixildo urde plans para matalo, foxe a territorio franco.

Pelaxio II, sen esperanzas de recibir axuda imperial, escribe a Aunacharius de Auxerre para que inflúa nos reis francos e estes axuden á cidade contra os lombardos arianos mediante unha alianza entre o Imperio e os francos.

peste no sur de Gallia e no levante hispano.

expedición militar de Aidan, rei de Dal Riada (Escocia), contra as Orcadas.

Clodoveo, fillo e herdeiro de Chilperico I, despois da morte dos tres fillos de Fredegunda por enfermidade, é encarcerado en Noisy, e logo apuñalado por orden desta. En Mans, tamén fai que asasinen a Audovera, súa nai, e que violen e encerren a Basina, irmá de Clodoveo, no mosteiro de santa Cruz de Poitiers.

lumes cerca de Burdigalia e Aurelianum; tremor de terra en Burdigalia; inundacións en Limaña en outono; enchentas do Ródano e o Saona eu outubro: inundación de Lugdunum e dos suburbios de Arelate, onde o circo é devastado e nunca máis será rehabilitado.

Gregorio de Tours debe comparecer ante un sínodo de bispos acusado de difamar a Fredegunda.

os eslavos seguen migrando masivamente aos Balcáns. Os avaros baixo Bayan I invaden o baixo Danubio (moderna Bulgaria).

asedio de Sirmium: os avaros marchan ao longo da ribeira dereita do Save e asedian a cidade.

os lombardos acaban cos últimos redutos ostrogodos nos Alpes. Os duques adoptan títulos, nomes e tradicións romanas.

Aethelberht sucede a Eormenric como rei (bretwalda) de Kent.

os inquisidores cristiáns atacan un templo segredo de Zeus en Antioquía. O sacerdote suicídase pero o resto de pagáns son arrestados. Todos os prisioneiros, incluído o vicegobernador Anatolio, son torturados e enviados a Constantinopla para comparecer en xuízo. Son sentenciados a morte devorados polos leóns, pero como non lles atacan as feras son finalmente crucificados e os cadáveres arrastrados nas rúas pola chusma cristián e depositados nun vertedoiro sen ningún tipo de rito funerario.

nace Máximo Confesor nunha vila de Palestina, Hesfin, ao leste do Lago Tiberias coma resultado dunha relación adúltera entre un samaritano e unha escrava persa. Bautizárono coma Moschion.

primavera – verán: o rei ghassánida al-Mundhir é recibido por Tiberio II en Constantinopla para mediar e tentar reconciliar monofisitas e partidarios de Calcedonia e parar as persecucións contra os monofisitas.

verán: Mauricio dirixe a súa segunda campaña militar.

an-Numan III, soberano dos lahkmidas.

a dinastía Zhou, asentada no río Wei, domina o norte de China; só a dinastía Chen, no sur, é rival abondo.

Ye (Henan) é completamente destruída por Yang Jian (futuro emperadorr Sui), que derrota aos resistentes ao mando de Yuchi Jiong.

os pagáns de Helipolis (Syria) sublévanse e atacan a comunidade cristián. Fanse sacrificios a Zeus en Edessa.

morren Martiño de Dumio e Paulo Silenciario (poeta bizantino).

579

Gosvinta e Leovixildo
leodegundia.blogspot.com

concértase o casamento de Hermenexildo e Ingunda (12 anos), filla de Sixeberto I de Austrasia (católica e ariano), quen viaxa a Toletum pero ao pasar por Agde o bispo Fronimius pídelle que non acepte converterse ao arianismo. Leovixildo entérase e trata de retirar o bispo da súa sede. Cando Ingunda chega a Toletum, Gosvinta, súa avoa, trata de convencela para que se converta pero négase e golpéaa e chega a facerlle sangue, ordena espila e somerxela nun estanque cheo de peixes para convencela, pero tampouco logra o seu propósito.

Leovixildo nomea a Hermenexildo dux en Baetica, quen pasa a residir en Hispalis, onde o bispo da cidade, Leandro, exerce gran influencia sobre el ata que finalmente se bautiza polo rito católico co nome de Xoán. Este feito constitúe en si mesmo unha rebelión contra seu pai, ariano. Leovixildo trata de entrevistarse con el pero, desconfiado, Hermenexildo négase e busca alianzas cos suevos e hispanoromanos.

Leandro, posuidor dunha biblioteca amplísima, viaxa a Constantinopla en busca de axuda contra os arianos.

Waroch II invade Rennes e o seu territorio ata Cornut. Ennius de Vanne, libre, é enviado a Angers para negociar un acordo. O duque franco Beppoleno é enviado a arrasar a Armorica, o que provoca unha nova invasión bretona que saquea os territorios de Rennes e Nantes, onde se fan coas colleitas. O bispo Félix de Nantes fracasa ao tratar de impedilo.

Peotovio (Ptuj) e Virunum (Klagenfurt) en Pannonia caen en mans dos eslavos.

a venda de bispados a quen máis pague e a forte carga impositiva (10% sobre os ingresos) provoca unha revolta no Limousin, Poitou e Armorica. Os representantes de Chilperico I son perseguidos pero as tropas reprimen duramente os altercados.

Frithuwaldo sucede a seu irmán Theodric como rei de Bernicia (Escocia) logo de que este morra loitando contra os britanos.

Cosroes I busca a paz cos bizantinos pero morre antes de poder chegar a un acordo. Mauricio fortifica as fronteiras en Armenia e Syria.

verán: Hormizdas IV sucede a seu pai Cosroes e rexeita ceder territorios e rompe as negociacións cos bizantinos. Os turcos invaden Khorasan e alcanzan Hyrcania, no Caspio.

Xuan Di abdica en Jing Di (6 anos) e actúa como rexente da dinastía Zhou do norte.

a pesar da suspensión dunha monarquía unificada, os ducados de Spoleto e Benevento conservan a súa agresividade. Farwald asedia Roma.

xullo, 30: morre Bieito I.

novembro, 3: concilio de Grado. A se patriarcal de Aquileia é transferida a Grado pero segue a ser cismática, oposta aos ‘tres capítulos’

novembro, 26: elixen e consagran sen a pertinente autorización imperial a Pelaxio II por causa do asedio lombardo; o novo papa colabora en paliar a carencia de alimentos básicos para a poboación.

o senado romano envía unha embaixada a Constantinopla cun agasallo para Tiberio II Constantino de 3000 libras de ouro e coa intención tamén de pedir axuda contra os lombardos. Esta é a última actuación do senado que testemuñan as fontes.

Pelaxio II envía con eles a Gregorio como apocrisiarius a Constantinopla.

Roma resiste o asedio lombardo e Farwald dirixise cara Classis, porto de Ravenna, do que se apodera.

os bispos de Roma teñen tanta relevancia ou máis que o exarca de Ravenna nas negociacións e relación cos lombardos.

578

solidus de Tiberio II
es.wikipedia.org

Leovixildo funda Recopolis en honra de seu fillo Recaredo pero ten que someter unha enorme revolta na costa da Tarraconensis.

Mauricio, magister militum per Orientem, invade Mesopotamia e ataca a ambas ribeiras do Tigris. Deporta 70000 persoas de Hyrcania a Chipre e instala colonos militares para custodiar posicións estratéxicas.

verán: Wu Di emprende campañas militares en dúas frontes: contra os turcos invasores ao norte e contra a dinastía Chen no sur; sen embargo, cae enfermo e morre sendo sucedido polo seu primoxénito Xuan Di como emperador Zhou.

outubro, 5: morre Xustino II logo de varios períodos de demencia. Tiberio reina co nome de Tiberio II Constantino.

en Armorica, o lider Waroch II apodérase de Vannes e impón o seu dominio sobre Broerec. Chilperico I reacciona e recruta un exército en Touraine, Bessin, Maine, Anjou e Poitou. O continxente saxón de Bessin é derrotado polos bretóns en Vilaine, daquela fronteira da Bretaña. Waroch pide a paz e obtén Vannes a cambio dun tributo anual, garantido pola entrega dos seus fillos como reféns.

o príncipe bereber Garmul, sublevado contra os bizantinos en Mauretania, é derrotado e morto polo patricio Gennadius.

os etíopes axumitas que inda quedaban en Arabia son definitivamente expulsados polos persas. Dúas flotas persas chegadas de portos de Iemen atacan os portos etíopes, que perden así a súa supremacía comercial na zona.

fúndase en Xapón a empresa construtora máis antiga da que se teñan datos, Kongō Gumi en Osaka, sobrevivirá ata 2006.

(ata 582) iníciase unha nova vaga de torturas e crucifixións a pagáns helenos na parte oriental do imperio; os últimos que quedan en Heliopolis (Baalbek) son exterminados.

Butz Chan, soberano da cidade maia de Copan.

morren Xacobe Baradai (bispo de Edessa e teólogo da igrexa siriaca monofisita), Wuffa (rei de East Anglia), Abd al-Muttalib (avó de Muhammad) e Zerezindo (dux visigodo da Cartaginensis).

576

muíños en Tomiño, parte do antigo territorio de 'Turonio'
xoanarcodavella.blogspot.com

gran campaña de Leovixildo en territorio suevo, probablemente no baixo Miño (Tui e Toronio, na zona, son obxecto de acuñacións godas no reinado de Recaredo coas lendas ‘VICTORIA IN TVDE’ e ‘TORNIO VICTORIA’ e os vándalos desembarcaran en Toronio en 430).

Miro vese obrigado a asinar un acordo de paz que supón a súa submisión efectiva a Leovixildo: “... a rege Mirone per legatus rogatus pacem ei pro parvo tempore tribuit ...” segundo Xoán de Biclaro.

abril, 5 (pascua): Meroveo, fillo de Chilperico I e Audovera, é enviado por este a someter o Poitou e detense en Tours co pretexto de visitar a súa nai; diríxese a Rouen e casa con Brunequilda.

Chilperico intervén el mesmo e reenvía a Brunequilda a Metz con Childeberto II e volve a Soissons con Meroveo. A cidade rebélase e expulsa a Fredegunda e seu fillo Clodoveo. Chilperico entra na cidade e sométea e encerra alí a Meroveo.

maio: en Clermont, a mañá da ‘ascensión’, un xudeu verte aceite na túnica dun converso e a plebe, indignada, ataca e destrúe a sinagoga. O bispo, Avitus, obriga a 500 xudeus a converterse e o resto ten que marchar a Marsella.

Chilperico I envía o duque Didier a Aquitania pero é vencido polo patricio Mummolus, home de Gontran, en Limousin.

Tiberio asina a paz con Cosroes I, o que lle permite centrarse en Italia. Suborna e concede títulos aos lombardos máis poderosos, e asina tratados cos francos para que non interveñan.

Baduarius, xenro de Xustino II, é enviado a Italia para loitar contra os lombardos. A súa campaña fracasa e morre pouco despois. Decius sucede a Baduarius como exarca de Ravenna.

os turcos baixo Tardu cruzan o Bósforo cimerio e pasan a Crimea onde asedian a cidade de Panticapaeum.

575

codex Amiantinus
Casiodoro
es.wikipedia.org

Leovixildo dirixe ataques contra zonas no NE do conventus bracarensis; anexiona a rexión dos montes Aregenses (na parte oriental da actual provincia de Ourense) baixo o poder do magnate local Aspidium, que seguramente apoia os suevos e resulta capturado.

morre Casiodoro: dedicara os últimos anos á vida monástica, fundamentalmente en Vivarium reunindo libros de toda especie e promovendo a súa copia; esta práctica é sistematizada polos beneditinos, e así se conservan moitos libros da antigüidade.

primavera: durante as negociacións cos bizantinos para ampliar a tregua de hostilidades, Cosroes I invade de súpeto a Armenia romana pero non pode tomar Teodosiópolis (Erzurum) e diríxese cara Capadocia, onde se atopa co xeneral bizantino Xustiniano e os armenios rebeldes, que lle infrinxen unha gran derrota en Melitene (Malatya). O exército de Cosroes I debe atravesar o Éufrates retirándose en desorde, despois de incendiar Melitene e Sebaste. Xustiniano reocupa a Armenia persa. Logo sufre varias derrotas debido á indisciplina dos auxiliares bárbaros

xuño, 2: Bieito I elixido novo bispo de Roma, logo de case un ano de ‘sé vacante’.

no sur de India únense varias tribos baixo Simhavisnú (dinastía Pallava, con dous séculos de historia) e algunhas dinastías veciñas, como os Pandya ou os Chalukya, tratan de contrarrestar o seu poder.

moitos nobres rexeitan que Leovixildo asociara a Recaredo e Hermenexildo porque os priva do seu tradicional dereito a elixir novo rei, pero o rei sabe contelos. Derroga a lei que prohibe casamentos entre godos e católicos e publica un código lexislativo (non conservado) que tendía a eliminar a dualidade existente e pola que godos e hispanorromanos se rexían por códigos distintos.

nace Heraclio o Novo, fillo de Heraclio o Vello e Epiphania, de orixe armenia.

o duque lombardo Ewin de Triente rexeita un ataque franco e casa coa filla de Garibaldo I, duque bávaro.

Xoán de Bíclaro regresa a Hispania desde Constantinopla, despois dunha estancia de 17 anos, o que o convertera en partidario de todo o bizantino. Tan pronto como regresa vese envolto en controversias relixiosas. Leovixildo promove a fe ariana e acaba chocando con Xoán, que resulta exiliado en Barcino durante dez anos.

o ghassánida al-Mundhir, reconciliado cos bizantinos, saquea e incendia al-Hira, capital dos lakhmidas.

Chilperico I renova unha alianza con Gontran e marcha cara Reims. Sixeberto I busca alianzas coas ‘nacións alén do Rhenus’ penetra nos dominios de Chilperico I, conquista Poitiers e Tournai e chega ata o mesmo París, onde se establece mentres os duques Gontran, Boson e Godexiselo derrotan as tropas de Neustria de Thiberto, fillo de Chilperico, en Angoumo e mátano. Chilperico refúxiase en Tournai mentres Sixeberto se proclama vencedor.

decembro: durante a súa proclamación como rei de Neustria polos nobres, dous asasinos pagados por Fredegunda conseguen matar a Sixeberto en Vitry, co que as súas tropas se retiran, sendo Brunequilda feita prisioneira.

Brunequilda resulta exiliada en Rouen. O duque Gondobaldo logra salvar a Childeberto II (5 anos), fillo de Sixeberto e Brunequilda.

decembro, 25: Chilperico non pode evitar que se proclame en Metz como rei de Austrasia a Childeberto II. Brunequilda actúa como rexente oficial do seu fillo pero realmente son os nobres que goberna Austrasia, principalmente Gogon.

convención de Druim Cett: os reis irlandeses discuten a relación a manter con Áedán mac Gabráin de Dál Riata: a colonia é confirmada.

East Anglia divídese nos condados ingleses de Norfolk e Suffolk e quizás a parte oriental dos Fens de Cambridgeshire.

Alexandre de Tralles, médico grego, escribe libri duodecim de re medica.

Qara-Churin Turk Bogiu, Tardu sucede a seu pai Istämi como yabgu do khaganato turco occidental. Seu irmán Bokhan Shad visita e pasa épocas no palacio de Constantinopla. Os turcos orientais son gobernados por Arslan Tobo-Khan, Taspar.

Zhiyi, monxe chinés, viaxa ao monte Tiantai para estudar; traballa cun grupo de discípulos na meditación hindú da śamatha e vipaśyanā.

Varaja Mijira publica Pañcha siddhāntikā (tratado das cinco conclusións [astronómicas]).

574

www.adevaherranz.es
ubi leouigildo rege cantabros occidit
'Millán de la Cogolla'

Leovixildo ataca Cantabria e destrúe Amaia; descabeza os seus dirixentes (os membros do ‘senado’ cántabro e o seu líder Abundancio son executados) e integra os territorios no reino godo.

embaixada de Miro ao rei Gontran en resposta á expedición de Leovixildo contra Cantabria; con toda probabilidade para tratar de concertar unha alianza. Son interceptados por Chilperico I.

xullo, 13: morre Xoán III; non se elixe sucesor a causa da presenza de tropas lombardas, que interrompen as comunicacións.

Clef é asasinado por un escravo que maltratara. Os nobres deciden non elixir sucesor; como consecuencia, aparecen ducados lombardos independentes, como Spoleto e Benevento, no sur da península.

seguen as hostilidades entre Chilperico I e Sixeberto I.

decembro, 7: Xustino II asocia a Tiberio ao poder: o emperador perde o equilibro mental (quizás polos continuos reveses militares: Italia, Balcáns, contra Persia, …) e sufre crises: parálise nas extremidades, … Faise evidente que non pode exercer o poder e búscase un substituto. O seu único fillo morrera e non confía no resto de parentes. Sofía convénceo para que adopte e asocie ao poder a Tiberio, xefe dos gardas de palacio.

Sofía e Tiberio asinan un ano de paz cos persas cun custe de 45000 solidi; o cese de hostilidades afecta a Mesopotamia porque no Cáucaso continúan os choques.

Áedán mac Gabráin, rei de Dál Riata en Escocia.

os persas acaban co réxime axumita en Iemen, apoiado polos bizantinos. Cosroes I fai do territorio unha satrapía persa. O rei Kaleb morre durante a conquista.