496

batalla de Tolbiacum
www.diomedia.com

Paulus, cónsul único.

febreiro, 14: Xelasio promove o día de Valentín na súa tentativa de abolir e prohibir as lupercalia.

os godos acaban cunha usurpación en Hispania: Burdunelus proclámase augustus; (podemos deducilo de “tyranidem assumit”: describíndose coma tyrannus, probablemente se autotitularía coma augustus) pero é abandonado polos seus partidarios e levado a Tolosa, onde o queiman vivo dentro dun boi de bronce.

morre Guntamundo (46 anos), sucedido por seu irmán Trasamundo, que casa pouco despois con Amalafrida, irmá de Teodorico o amalo. É culto, afeccionado á poesía e teólogo (ariano). Tivo problemas continuos cos mauros.

os francos depredan Saintes.

os alamanos séntense ameazados por Teodorico I e deciden penetrar en territorios francos e burgundos. Clodoveo usa o argumento da defensa propia para pasar ao ataque. Prodúcese unha encarnizada batalla en Tolbiacum (Zülpich), que gañan os francos con grandes perdas e a morte do líder alamano Xibuldo. A zona entre Neckar, Alb e Main pasa ao reino franco.

Khavad I é deposto, encarcerado e exiliado a Susiana logo de que fracasara no intento de quebrar o poder dos magnates. Sucédeo seu irmán máis novo Zamaspes.

novembro, 21: morre Xelasio I e elixen a Anastasius II, que decide restablecer os vínculos entre Roma e Constantinopla.

Anastasius depón e excomunga a Euphemius e envíao ao exilio. O seu sucesor como patriarca de Constantinopla é Makedonios II.

co decretum gelasiarum elabórase unha listaxe de libros prohibidos pola igrexa.

494

representación das "lupercalia"
lupercalia-edmonton.com

Rufius e Praesidius, cónsules.

febreiro, 15: Xelasio I impulsa a candelaria (festa de purificación) para substituír as pagás da lupercalia.

Xelasio I envía unha carta a Anastasius onde expón por primeira vez a súa teoría das “dúas espadas,” unha imaxe que expresaría o papel do estado e da igrexa.

Latakia, cidade portuaria en Siria, é destruída por un tremor de terra.

Clodoveo I ataca territorios aquitanos baixo control godo.

Xelasio distingue os textos canónicos dos apócrifos.

esculturas budistas das grutas de Longmen, próximas a Luoyang.

Xiao Wen Di comeza adoptar políticas de sinicización: fai do chinés a lingua oficial da corte e ordena que os seus nobres adopten nomes chineses. Casa con Feng Qing e muda a capital de Datong a Luoyang.

os godos entran en Hispania e interveñen nas dinámicas sociais de certas cidades do norte; por exemplo, Caesaraugusta.

agosto, 10: Guntamundo decide reabrir os templos católicos e permitir o retorno dos bispos católicos.

en Arabia comezan hostilidades, que durarán 40 anos, entre as tribos Tamim e Taghlib.

484

Alarico II
wikipedia.common.org

Venantius e Teodorico o Amalo, cónsules.

xaneiro, 14: eclipse total de sol en Asia Menor.

febreiro, 24: Hunerico publica un decreto que establece un prazo (xuño, 1) para que os católicos se convertan ao arianismo; os bispos son retirados das súas sés, algúns son exiliados a Córcega, outros martirizados, incluíndo o anterior procónsul imperial Victoriano e Frumentius, xunto con outros mercadores. Son axustizados en Hadrumetum logo de rexeitar a conversión.

Vitor de Vita conta que a poboación de Tipassa embarca e fuxe cara Hispania.

maio, 20: en Pentecostés revolta samaritana en Cesarea e Nablus (Palestina). Zenón reprímeos e ordena edificar a construción da igrexa de monte Garizim, consagrada a María, non emprazamento do templo samaritano.

xullo, 19: Illus e Verina rebélanse contra Zenón, que envía un exército baixo o xeneral isauro Leontius, pero os rebeldes conseguen que este cambie de bando e proclámano augustus en Tarsus. Verina solicita apoio nas dioceses do leste e en Exipto. Fixan a sede imperial en Antioquía.

xullo, 28: Fiz II excomunga a Acacius de Constantinopla e Pedro III de Alexandría, polo papel que xogaron no henotikon dous anos antes. Considera o edicto unha herexía e o cisma entre Roma e Constantinopla aumenta (cisma acaciano, ata 519).

Illus libera a Marcianus e envíao a Italia para conseguir apoio de Odoacro. Zenón emprega os federados xermánicos para derrotar os inimigos. Persuade aos rugos para que ataquen a Odoacro e un exército baixo Iohannes Skytha e Teodorico é enviado ao leste. Esta forza aparta a Illus de Antioquía logo de tela no seu poder de só 12 días (agosto, 8). Iohannes cerca a Illus en Papirius. Verina morre durante o asedio.

os hunos hephtalitas invaden Persia, Peroz I reúne un gran exército e deixa a seu irmán Vologases como rexente en Ctesifonte; morre na batalla de Herat, onde os persas son emboscados e arrasados. O corpo de Peroz é devolto aos persas que o soterran con todos os honores. Vologases sube ao trono, iniciándose un período de anarquía.

no tratado de Nvarsak Vahan Mamikonian, xefe armenio en rebeldía dende 480, obtén liberdades políticas e relixiosas (o cristianismo é recoñecido como relixión oficial de Armenia) a cambio de axuda militar. É nomeado gobernador.

Blosius Aemilius Dracontius compón en Carthago un panexírico sobre un soberano non ariano, supostamente Zenón, que lle vale pena de prisión.

Gundobado proclama a lex burgundionum, un código legal que recolle normas sobre casamentos, herdanzas, o weregild e outras cuestións.

Eurico constrúe unha protección para Carcassona nunha curva do río Aude.

Clodoveo goberna os francos salios (na ribeira do río Salia) e Sixeberto o resto, os ripuarios. Clodoveo apela ao orgullo franco para combater a Siagrius (rex romanorum).

a Notitia Provinciarum et Civitatum Africae, documento vándalo, menciona tres bispados en Baleares e os seus bispos (Macario, Minorca – Helias, Maiorica – Opilio, Evuso); sendo tamén mencionada a súa vinculación metropolitana a Caralis; sería a nomina episcoporum insulae Sardiniae. A organización eclesiástica territorial tardía correspóndese coa civil e administrativa.

no sínodo de Beth-Lapat impóñense as teses nestorianas no ámbito cristián en territorios sasánidas.

decembro, 23: morre Hunerico, sucedido polo seu sobriño Guntamundo, que proxecta deter as persecucións contra os católicos e estabilizar a economía dos seus dominios.

decembro, 28: morre Eurico, que é sucedido polo seu fillo Alarico II.

Jayavarman, rei de Fou-nan, envía unha embaixada ao Qi en China para solicitar axuda contra o reino de Lin Yi (centro do actual Vietnam); ao parecer a embaixada non tivo éxito.